Girmek
Azerbaýjan Respublikasynyň Baku şäherinde Geýdar Aliýewiň doglan gününiň 100 ýyllygyna bagyşlanyp talyplaryň arasynda guralan basketbol boýunça halkara ýaryşy tamamlandy. Bu ýaryşda Türkmenistanyň erkekler ýygyndy topary hem çykyş etdi.
Abraýly ýaryşa 7 döwletiň — Türkmenistanyň, Russiýa Federasiýasynyň, Gruziýanyň, Azerbaýjanyň, Türkiýäniň, Özbegistanyň we Belarus Respublikasynyň talyp türgenlerinden ybarat bolan ýygyndy toparlar gatnaşdylar.
Türkmen ýygyndysy toparçadaky tapgyry şowly tamamlady. Ilkinji oýnunda Azerbaýjandan az-kem asgyn gelen türkmenistanlylar ikinji duşuşykda Özbegistan Respublikasyny 90-89, toparçanyň ahyrky oýnunda bolsa Belarusy 84-78 hasabynda ýeňdiler. Şeýlelikde, türkmen topary ýarymfinalda çykyş etmäge hukuk gazandy.
Finala çykmak üçin göreşde Russiýa Federasiýasyndan asgyn gelen türkmen ýygyndysy üçünji orun ugrundaky göreşde ýer eýeleriniň — Azerbaýjan Respublikasynyň ikinji ýygyndy toparyny 83-64 hasabynda ahmyrda goýdy we ýaryşyň bürünç medalyna eýe boldy.