Türkmenistanyň hokkeý boýunça milli ýygyndysy şu gije dünýä çempionatynyň üçünji dwizionynyň «A» toparçasyndaky ilkinji duşuşygyny geçirer.

Bu toparçanyň duşuşyklary Günorta Afrika Respublikasynyň Keýptaun şäherinde geçirilýär, duşuşyklar 23-nji aprele çenli dowame eder. Ikinji dwizionyň «B» toparçasyna çykmak ugrundaky ýaryş 5 ýygyndynyň ― Lýuksemburgyň, Taýlandyň, Taýwanyň, Türkmenistanyň we ýer eýeleriniň arasynda geçiriler.

Türkmenistanyň milli ýygyndysy ýaryşdaky ilkinji duşuşygyny şu gije ýer eýeleriniň wekilleri bilen geçirer. Keýptaun şäherindäki «Buzly stansiýa» sport toplumynda geçiriljek duşuşyk 23:00-da başlanar.

Baýram Allaýarowyň şägirtleriniň ertirki garşydaşlary Lýuksemburgyň, 20-nji apreldäki garşydaşlary bolsa Taýwanyň ýygyndylary bolar. Türkmen ýygyndysy «A» toparçada geçen ýyllarda iki gezek bürünç medala eýe boldy.

Türkmenistanyň ýygyndysynyň bu günki garşydaşy ― GAR-yň ýygyndysy IIHF-niň reýtinginde 51-nji orny eýeleýär. Ol Türkmenistanyň ýygyndysyndan 3 basgançak aşakdadyr. Iki ýygyndy mundan ozal taryhda bir duşuşyk geçirdiler. 2019-njy ýylyň 23-nji aprelinde Bolgariýanyň Sofiýa şäherinde geçirilen dünýä çempionatynyň saýlama tapgyrynyň çägindäki duşuşykda türkmen ýygyndysy 7:2 hasabynda ýeňiş gazandy.

Türkmenistanyň hokkeý ýygyndysynyň Dünýä çempionaty ― 2023-däki senenamasy:

• Türkmenistan — GAR (17-nji aprel, Aşgabat wagty bilen 23:00);
• Lýuksemburg — Türkmenistan (19-njy aprel, Aşgabat wagty bilen 19:00);
• Taýland — Türkmenistan (20-nji aprel, Aşgabat wagty bilen 23:00);
• Türkmenistan — Taýwan (23-nji aprel, Aşgabat wagty bilen 17:00).