Girmek
16-njy martda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türki Döwletleriň Guramasynyň nobatdan daşary sammitiniň çäklerinde Özbegistanyň Prezidenti Şawkat Mirziýoýew bilen duşuşdy. Bu barada özbek Lideriniň metbugat gullugy habar berýär.
Duşuşykda geçen ýyl amala aşyrylan ýokary derejeli saparlaryň çäklerinde gazanylan ylalaşyklary durmuşa geçirmek bilen bagly meseleler ara alnyp maslahatlaşyldy.
Taraplar dürli derejelerdäki dialoglaryň ähmiýetine, golaýda geçirilen Söwda-ykdysady, ylmy-tehniki we medeni hyzmatdaşlyk boýunça Türkmen-özbek hökümetara toparynyň mejlisiniň jemlerine ýokary baha berdiler hem-de iki ýurduň arasyndaky söwda dolanyşygynyň mukdarynyň yzygiderli ýokarlanýandygy we ileri tutulýan ugurlarda hyzmatdaşlygyň geriminiň giňeýändigini kanagatlanma bilen bellediler.
Mundan başga-da serhetýaka söwda zolagyny döretmeklige, energetika, maşyngurluşyk, ulag-logistika, oba-hojalygy we beýleki pudaklarda bilelikdäki möhüm taslamalary durmuşa geçirmeklige aýratyn üns berildi.
Duşuşygyň dowamynda sebit gün tertibiniň möhüm meseleleri boýunça hem pikir alşyldy.