Ozal habar berşimiz ýaly, ýekşenbe güni türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň Içeri işler ministrliginiň Sport-ulag merkezine baryp, ol ýerde merkeze täze gelip gowşan sport ulaglaryny synagdan geçirdi.

«Watan» habarlar gepleşiginde mälim edilmegine görä, 2023-nji ýylyň 6 — 15-nji iýuly aralygynda «Ýüpek ýoly – 2023» ady bilen, Kazan — Moskwa ugry boýunça halkara awtoralli ýaryşy geçiriler.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň Içeri işler ministrliginiň Sport-ulag merkezine täze gelip gowşan sport awtoulaglarynyň ähli görkezijilerine ýokary baha berip, öňde boljak abraýly halkara ýaryşlarda türkmen türgenlerine täze üstünlikleri arzuw etdi.

Ýeri gelende bellesek, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlangyjy boýunça geçirilen «Amul — Hazar 2018» halkara awtorallisi Türkmenistanyň halkara abraýynyň barha artýandygynyň, şol sanda ýurtda durmuşa geçirilýän parahatçylyk, dostluk we hoşniýetli goňşuçylyk syýasatynyň, sporty ösdürmek ugrundaky giň gerimli tagallalaryň dünýäde ykrar edilýändiginiň aýdyň beýany boldy.

Şeýle-de Türkmenistanyň Halk Maslahatynyň Başlygy Gurbanguly Berdimuhamedowyň başlangyjy boýunça 2009-njy ýylda «Ýüpek ýoly – 2009» atly Kazan — Aşgabat halkara awtorallisi, başga-da halkara awtoralli ýaryşlary geçirilip, olara türkmen türgenleriniň gatnaşandyklaryny hem-de ýokary netijeleri görkezendiklerini bellemek ýakymly.

Ýokary tizlikli, täze görnüşli sport ulaglarynyň gelip gowuşmagy Türkmenistanyň Içeri işler ministrliginiň Sport-ulag merkeziniň maddy-enjamlaýyn binýadynyň yzygiderli pugtalandyrylýandygyny, ýurtda awtomobil sportunyň ösdürilmegi ugrunda döwlet derejesinde alada edilýändigini görkezýär.

Awtomobil sporty boýunça dünýä ýurtlarynda geçirilýän halkara ýaryşlara türkmen türgenleri işjeň gatnaşýarlar.