Girmek
Türkmenistanyň Daşary işler ministriniň orunbasary Wepa Hajiýew Çehiýanyň Türkmenistandaky täze bellenilen Adatdan daşary we Doly ygtyýarly ilçisi (ilçihana Daşkent şäherinde ýerleşýär) Waslaw Ýilegi kabul etdi. Bu barada Türkmenistanyň DIM-niň resmi saýtynda habar berilýär.
Çehiýanyň Türkmenistandaky täze bellenilen Adatdan daşary we Doly ygtyýarly ilçisi Waslaw Ýilek Türkmenistanyň daşary işler ministriniň orunbasaryna ynanç hatynyň nusgasyny gowşurdy. Wepa Hajiýew ynanç hatynyň nusgasyny kabul edip, ilçini täze wezipä bellenilmegi bilen gutlap, oňa jogapkärli işinde üstünlik arzuw etdi.
Bellenilişi ýaly, duşuşygyň barşynda syýasy, söwda-ykdysady, bilim, medeni-ynsanperwer we beýleki ulgamlarda, şeýle hem halkara we sebit guramalarynyň çäklerindäki türkmen-çeh özara gatnaşyklarynyň ösüşiniň meseleleri ara alnyp maslahatlaşyldy. BMG we ÝB platformalaryndaky hyzmatdaşlyga, şol sanda parahatsöýüjilikli başlangyçlaryň özara goldaw berilmegine garaldy.
Diplomatlar dürli derejedäki ikitaraplaýyn gatnaşyklaryň möhüm ornunyň bardygyny, şeýle hem iki döwletiň daşary syýasat edaralarynyň arasynda syýasy maslahatlaşmalary geçirmegiň tejribesini dowam etdirmegiň wajyplygyny nygtap geçdiler.