Girmek
Şu günler Portugaliýada dowam eden dzýudo boýunça Gran-pri ýaryşynyň 60 kilograma çenli agram derejesinde türkmenistanly türgenleriň ikisi ýaryşdy. Olaryň ikisiniň hem öz wekilçilik edýän düşekçesinde ýarym finala çenli baryp ýetmegi kanagatlanarly üstünlikdir.
Erkekleriň arasynda Türkmenistanyň birinji reýtinginiň eýesi Hakberdi Jumaýew bu agram derejesiniň «B» düşekçesine wekilçilik etdi. Ilkinji tutluşygyny ýerli dzýudoçy Miguel Pisko bilen geçiren Hakberdi ondan üstün çykyp, soňra müsürli Adel Hamadany hem ýeňlişe sezewar etdi. Düşekçäniň finalyna barýan ýolda bolsa ol koreýaly Seungbom Jeondan asgyn geldi.
Bu agram derejäniň «C» düşekçesinde ýaryşan başga bir türkmenistanly dzýudoçy Aýbek Ömirow ilkinji garşydaşyny bilmek üçin müsürli Ýussr Semi bilen fransiýaly Rýan Konsekaonyň arasyndaky tutluşygyň netijesine garaşmaly boldy. Bu tutluşykda üstün çykan fransiýaly türgen soňra türkmenistanly garşydaşyndan asgyn geldi. Ýoluny üstünlik bilen dowam etdiren Aýbek bolsa düşekçäniň ýarym finalynda soňra bu ýaryşyň kümüş medalyny gazanan ispaniýaly dzýudoçy Fransisko Garrigosdan ýeňildi.