Türkmenistanyň Ermenistandaky ilçisi Muhammetgeldi Aýazow Ermenistanyň Milli Ylymlar akademiýasynyň Geofizika we inženerçilik seýsmologiýa institutynyň direktory Jon Karapetýan bilen duşuşdy.

J.Karapetýan häzirki wagta çenli iki hyzmatdaş institutyň hünärmenleriniň düýpli we amaly meseleleri çözmek maksady bilen ikitaraplaýyn ylmy-tehniki hyzmatdaşlygy çuňlaşdyrmakda we giňeltmekde özara gyzyklanmalarynyň gitdigiçe artýandygyny belledi. Bu isleg 2017-nji ýylda Türkmenistanyň Ylymlar akademiýasynyň Seýsmologiýa we atmosferanyň fizikasy instituty bilen Ermenistan Respublikasynyň Milli ylymlar akademiýasynyň A.Nazarow adyndaky Geofizika we inžener seýsmologiýasy institutynyň arasynda ylmy-tehniki hyzmatdaşlyk hakynda Şertnama gol çekilmegi bilen durmuşa geçirildi.

2012-nji ýylda Türkmenistanyň Hökümeti bilen Ermenistan Respublikasynyň Hökümetiniň arasynda Türkmenistanyň Ylymlar akademiýasynyň Seýsmologiýa we atmosferanyň fizikasy instituty bilen Ermenistan Respublikasynyň Milli ylymlar akademiýasynyň A.Nazarow adyndaky Geofizika we inžener seýsmologiýasy institutynyň arasynda ylmy-tehniki hyzmatdaşlyk hakynda ylalaşyga gol çekilendigini bellemek gerekdir. Bu maksada gönükdirlen hyzmatdaşlygyň dowamynda köp sanly duşuşyklar geçirildi we hyzmatdaşlar birnäçe gezek dürli halkara çärelerine gatnaşdylar, seýsmologik derňewler çygrynda tejribe alyşdylar. Iki döwletiň alymlarynyň hyzmatdaşlyk etmek babatyndaky gyzyklanmalary ylmy derňewleriň maksatlarynyň deň gelmegi, geofizika çygrynda seýsmologiýanyň öňünde durýan meňzeş meseleler we meseleleri çözmekde, seýsmiki howpa baha bermekde, seýsmiki howp we töwekgelçilik kartasyny döretmekde şeýle hem häzirki zaman enjamlaryny ulanmak bilen derňewiň täze usullaryny işläp taýýarlamakda meňzeş çemeleşmeler bilen düşündirilýär.

Söhbetdeşligiň dowamynda ilçi M.Aýazow myhmana Ahal welaýatynyň täze edara ediş merkeziniň — Arkadag şäheriniň konsepsiýasyny görkezdi, şeýle-de Institut-hyzmatdaş tarapyndan berlen ylmy derňewler we maglumatlar esasynda täze şäherde seýsmiki mikrosebitleýiş işleriniň geçirilýändigini habar berdi diýip, Türkmenistanyň DIM-niň resmi saýtynda habar berildi. Bellenilişi ýaly, bu bolsa, öz gezeginde, inženerçilik-geologiki maglumatlara laýyklykda kesgitlenen taksonomiki birlikleriň degişli serhetlerine laýyk gelýän dürli seýsmiki depginli zolaklary bellige almaga ýardam eder. Şeýle hem täze gurulýan şäheriň maketlerini we inženerçilik çözgütlerini öz içine alýan slaýd görkezildi.

Duşuşygyň ahyrynda J.Karapetýan Ahal welaýatynyň dolandyryş merkezinde gurulýan Arkadag şäheri barada maglumatlary ýaýbaňlandyrjakdygy barada habar berdi.