Girmek
Wise-premýer Mährijemal Mämmedowanyň ýolbaşçylygyndaky Türkmenistanyň wekiliýeti Pariže eden saparynyň çäginde, ÝUNESKO-nyň Medeniýet boýunça baş müdiriniň orunbasary Ernesto Ramires bilen duşuşyk geçirildi.
Duşuşykda jenap Ramires soňky birnäçe ýylda Türkmenistan bilen hyzmatdaşlygyň täze derejä çykandygyny nygtap, munuň özi gatnaşyklaryň işjeňleşmegine we ýurduň ÝUNESKO-nyň dürli maksatnamalaryna gatnaşmagyna itergi berendigini belledi.
Geljek ýyl Türkmenistanyň ÝUNESKO agzalygyna 30 ýyl doljakdygy bellenildi. Şunuň bilen baglylykda, taraplar bu möhüm senäni birnäçe dabaralar, medeni we beýleki çäreler bilen giňden belläp geçmek boýunça ylalaşdylar.
Duşuşygyň barşynda 1972-nji ýyldaky Bütindünýä miras konwensiýasy we 2003-nji ýyldaky maddy däl medeni mirasy goramak konwensiýasy boýunça çäreleriň durmuşa geçirilmegine Türkmenistanyň işjeň gatnaşandygy barada bellendi.
Mährijemal Mämmedowa geçen ýyl Magtymguly Pyragynyň mirasyny ÝUNESKO-nyň «Dünýäniň hakydasy» maksatnamasyna, şeýle-de akyldar şahyryň 300 ýyllyk ýubileýini ÝUNESKO-nyň şanly seneleriniň sanawyna goşmak boýunça hödürlenendigini aýtdy.
2024-nji ýylda Türkmenistanda türkmen edebiýatynyň nusgawy şahyry Magtymguly Pyragynyň 300 ýyllygy bellenilip geçilýär.