Girmek
Aktau şäherindäki (Gazagystan) «Mangistau Arena» stadionynda sambo boýunça Aziýanyň çempionaty geçirildi.
Dokuz döwletden 200-den gowrak türgeniň gatnaşmagynda geçirilen çempionatda erkekler we zenanlar türgenler sambo we söweş sambosy boýunça ýedi agram derejesinde ýaryşdylar.
Üç günläp dowam eden yklymyň açyk çempionatynda türkmenistanly türgenler medallaryň 11-sine mynasyp boldular. Olaryň biri altyn, 2-si kümüş, 8-si bolsa bürünç medallardyr.
Türkmen samboçylarynyň altyn medalyny söweş sambosy boýunça 50 kilograma çenli agram derejesinde çykyş eden Aýlar Melikowa gazandy.
Söweş sambosy boýunça 88, sport sambosy boýunça 79 kilograma çenli agram derejesindäki ýaryşlara goşulan Begenç Baltaýew bolsa iki ýaryşda-da hormat münberiniň ikinji basgançagyna çykdy.
Türkmen ýygyndysynyň bürünç medallaryny Muhammet Babekow (58 kilograma çenli agram derejesinde), Annageldi Annasähedow (88 kilogram), Nazar Lolleýew (98 kilogramdan ýokary), söweş sambosy boýunça Ýusup Taňryberdiýew (58 kilogram), Dawid Awçýan (71 kilogram), Sapar Döwletow (79 kilogram), Annageldi Annasähedow (88 kilogram) we Weronika Rus (54 kilogram) dagylar gazandylar.