Mary welaýatynyň Sakarçäge etrabynyň Hojadepe obasynda mekdebe çenli çagalara degişli täze binanyň gurluşygy tamamlandy. 320 orunlyk bu çagalar bakja-bagy Mary welaýatynda bar bolan mekdebe çenli çagalar edaralaryna degişli uly binadyr.

Mary welaýat Baş bilim müdirliginiň maglumatyna görä, 320 orunlyk çagalar baglarynyň birnäçesi öňden bar bolsa-da, ýakynda işe giriziljek bu täze bakja-bagynyň binagärlik durkunda ençeme aýratynlyklaryň, esasan hem dürli ýaşly çagalar üçin niýetlenen 16 topary açmaga mümkinçiligiň bolmagydyr diýip, «Türkmenistan: Altyn asyr» neşiri habar berýär.

Bu çagalar bagy otaglarynyň, daşky dynç alyş meýdançalarynyň abzallaşdyrylyşy, okuw otaglarynyň enjamlaşdyrylyşy boýunça hem ozalky bar bolanlardan tapawutlanýar. Binanyň töwereginde her topar üçin aýratyn oýun meýdançasy, saýaly bassyrma, hiňňildik bar. Binanyň içindäki we daky açyk meýdandaky suwa düşülýän howdanlar, çagalaryň ýaş aýtraynlyklaryna laýyklykda abzallaşdyrylan sport zaly körpeleriň sagdyn ösmeklerine mümkinçilik berer.

Dürli saz gurallary bilen üpjün edilen aýdym-saz zalynda hem gyzykly aýdym-saz we terbiýeçilik ähmiýetli çäreleri guramaga şertler bar.

Körpelere daşary ýurt dillerini öwretmek, olaryň mekdebe taýýarlygyny kämilleşdirmek üçin täze çagalar bagynda her biri 20 çaga niýetlenen 2 sany lingafon otagy we 2 sany kompýuter otaglary hem bar. Kompýuter otaglarynda multimedia tagtalary we her çaga üçin aýtaryn netbuklar goýlupdyr.

Topar otaglaryny we zallary abzallaşdyrmak, bezemek, binanyň daş töweregini abadanlaşdyrmak, enjamlary oturtmak we sazlamak işleriniň tamamlaýjy tapgyry dowam edýär. Çeşmäniň berýän habaryna görä, bu binany «Gül parça» hususy kärhanasy gurdy.