2022-nji ýylyň ilkinji üç aýynda Lebap welaýatynyň telekeçileri senagat önümleriniň onlarça tonnasyny Özbegistan, Türkiýe, Owganystan, Hytaý, Birleşen Arap Emirlikleri, Belarus, Azerbaýjan ýaly döwletlere eksport etdiler. Bu barada Türkmenistanyň Döwlet gümrük gullugynyň resmi web saýtynda habar berilýär.

Eksportyň işjeňleşmegine «Mizemez gadam» hususy kärhanasy hem uly goşant goşýar. Kärhana şu ýyl izogamyň 113,4 müň inedördül metrini eksport etdi. Önümiň agramly bölegini ― 83,86 inedördül metrini türkiýeli işewürler satyn aldylar. Şeýle hem 17,45 müň inedördül metr izogam Özbegistana eksport edildi. Önümiň 12,3 müň inedördül metri bolsa beýleki dünýä döwletlerine satyldy. Bu hususy kärhanada öndürilýän suwuk bitum mistikasynyň hem hyrydarlary köpelýär. Kärhana şu ýyl bu önümiň 610 tonna golaýyny Türkiýä, 742 tonnadan gowragyny bolsa Özbegistana eksport etdi.

Şu ýylyň ilkinji üç aýynda «Kökçi» hojalyk jemgyýeti goňşy Owganystan döwletine dürli güýjenmedäki akkumulýatorlaryň 1440 sanysyny eksport etdi.

«Çelek» hususy kärhanasy bolsa şu ýyl senagat garyndyly suwuklygyň 264 tonnasyny Hytaýa eksporta ugratdy. «Türkmen ojagy» hususy kärhanasy geýim-gejimlik nah pagtanyň eksporty boýunça türkiýeli işewürler bilen ýakyn hyzmatdaşlyk saklaýar. Şu ýylyň ilkinji üç aýynda bu hususy kärhana türkiýeli hyzmatdaşlaryna nah pagtanyň 42 müň 320 tonnasyny eksport etdi.

Çärjew etrabynda ýerleşýän «Gaýrat» hususy kärhanasy hem şu ýylyň başyndan bäri nah mata pamygynyň 476 tonnasyny Birleşen Arap Emirliklerine iberdi. Şu etrapda ýerleşen «Altyn saraý» hojalyk jemgyýeti bolsa şu ýyl polipropilen haltalaryň 18 tonna golaýyny Belarus Respublikasyna satdy. Saýat etrabyndaky «Geljege rowaç» hususy kärhanasy plastmassa asgyçlarynyň 150,5 müň sanysyny Azerbaýjana eksport etdi.

Çeşmäniň habar bermegine görä, hususyýetçiler Türkmenistanyň eksport kuwwatynyň ýokarlanmagyna uly goşantlaryny goşýarlar.

Şeýle-de okaň:

• «Ak gaýa» gurluşyk materiallarynyň kärhanasy hyzmatdaşlyk etmäge çagyrýar