Lebap welaýatynyň Dänew etrabynda hem-de Daşoguz welaýatynyň Görogly etrabynda miweli agaç nahallaryny oturtmak boýunça 5 günlük çäre geçirilip, ol BMG-niň Ösüş Maksatnamasynyň Türkmenistanyň gurak sebitlerindäki oba hojalyk durmuşynyň howa şertlerine durnukly ykdysady goldaw bermek bilen bagly taslamasy tarapyndan guraldy.

Bu çärä hususy pudagyň, ýerli jemgyýetiň, ýokary okuw mekdepleriň we ýerli dolandyryş edaralarynyň 50-den gowrak wekilleri gatnaşdy.

Köpçülikleýin geçirilýän çäräniň esasy maksady howanyň üýtgemegine uýgunlaşmak we esasy ýa-da alternatiw girdeji çeşmesi hökmünde bagbançylygyň ösmegini goldamak arkaly oba ilatynyň, şol sanda aýallaryň we gyzlaryň durmuş ýagdaýyny gowulandyrmakdan ybarat.

Jemgyýetçilik çäresiniň dowamynda Özbegistanyň Samarkant şäheriniň bagyndan USAID-iň Merkezi Aziýa bäsdeşlik, söwda we iş ýerleri (CTJ) boýunça taslamasynyň goldawy bilen 5000 miweli agaç nahaly satyn alyndy we oturdyldy.

Bu çäre hojalyklaryň we daýhançylyk işiniň gowulandyrylmagyna, suw çeşmeleriniň ýetmezçiliginiň we howanyň üýtgemeginiň şertlerinde ösdürilip ýetişdirilýän ekinleriň hasyllylygyny we düşewüntliligini ýokarlandyrmaga gönükdirilendir.

Miweli agaç nahallaryny oturtmak işi birnäçe okuw sapaklaryndan we sebit şertlerinde bagbançylygy ösdürmek üçin amaly görkezmeleri we teklipleri işläp düzmekden ybarat bolup, Halkara ösüşi boýunça ABŞ-nyň agentliginiň maliýeleşdirmegi bilen Türkmenistanyň döwlet dolandyrylyşyny durmuşa geçirmegi ösdürmek bilen bagly maksatnamanyň esasynda guraldy.

Okuwlara has işjeň gatnaşanlar üçin suwy tygşytlamakda ulanylýan damjalaýyn suwaryş ulgamy satyn alyndy we bagbançylygy ösdürmekde nahallary iýmitlendirmek üçin zerur bolan biogumus önümçiligi ýola goýuldy.

Taslama işiniň çäginde BMGÖM oba derejesinde toplumlaýyn we pudagara ekosistema çemeleşmesini girizmegi meýilleşdirýär. BMGÖM-iň press-relizinde habar berlişine laýyklykda, ygtyýarly bagçylygy ösdürmek üçin üstünlikli we yzygiderli tejribeleriň paýlaşylmagy ýerli jemgyýetiň mümkinçiliklerini artdyrmak bilen bir hatarda, ýer we suw dolandyryşynyň has durnukly bolmagyna goşant goşýar we ýerli ilatyň goşmaça girdeji çeşmesini döretmek mümkinçiligini artdyrýar.