Düýn agşam Şweýsariýanyň “Bazel” topary bilen Gazagystanyň “Kaýrat” futbol toparynyň arasynda Konferensiýanyň ligasynyň toparçadaky duşuşygy geçirildi. Bazel şäheriniň “Sant-Ýakob Park” stadionynda geçen bu duşuşyk özboluşly dartgynlylygy döretdi. Netijede, ýer eýeleri gazak toparyny 4:2 hasap bilen ýeňmegi başardy.

Duşuşykda “Bazeliň” düzüminden Artur Kabral (15-nji minutda), Mihaýel Lang (21, 40), şeýle-de Den Ndoý (49) ýaly futbolçylar tapawutlandy. “Kaýrat” bolsa Žoze Kante (65) hem-de Rikardu Alweşiň (69, penaltiden) geçiren pökgüleri bilen hasabyny artdyrdy.

Gyzykly geçen oýundan soň guralan metbugat konferensiýasynda “Kaýrat” toparynyň tälimçisi, ildeşimiz Gurban Berdiýew duşuşygyň netijesi dogrusynda belläp geçdi:

— “Bazel” mynasyp ýeňiş gazandy. Biz ýerliksiz pökgüleri goýberdik, bu bolsa toparymyzyň guramaçylykly oýnuny üýtgetdi. Oýnuň ikinji ýarymynda bolsa elimizden gelenimizi edip, başarýan hakyky oýnumyzy görkezdik. Biz ýene-de birnäçe pökgi geçirip bilerdik, emma netije netijeligine galýar.

Konferensiýanyň ligasynda çykyşyny dowam etdirýän “Kaýrat” indiki duşuşygyny 21-nji oktýabrda myhmançylykda, Azerbaýjanyň “Karabah” toparyna garşy geçirer.

Belläp geçsek, häzirki wagtda degişli ýaryşyň çäginde “Karabah” topary geçiren we goýberen pökgüleriniň hasabyna “Bazelden” tapawutlanyp, H toparçanyň birinji ornuny eýeleýär. Umumy netije boýunça toparlaryň hersi ýaryşy 4 utuk bilen dowam edýär, “Kaýrat” we “Omoniýa” toparlary bolsa 1 utuk bilen toparçanyň soňky orunlaryny paýlaşýarlar.