«Ahal» futbol toparynyň tälimçiler we oýunçylar düzümi şu gün Farap gümrük nokady arkaly AFK-nyň kubogy ― 2021-iň sebitleýin finalyna gatnaşmak üçin Özbegistana geçdi.

Topary Türkmenabadyň Halkara howa menzilinde Türkmenistanyň Futbol federasiýasynyň wekilleri garşylady. Topar bu ýerden awtobusda Farap gümrük nokadyna sary ýola düşdi. Nokatdaky barlag-gözegçilik işleri tamamlanansoň, topar Özbegistan Respublikasyna geçdi.

«Ahal» yklym ýaryşyndaky sebitleýin finalda Garşy şäheriniň «Nasafy» bilen duşuşar. Bu duşuşyk 25-nji awgustda bolar.