2021-nji ýylyň 1-nji iýunda Türkmenistanyň jemgyýetçilik guramalary üçin guralan “Türkmenistanyň jemgyýetçilik guramalarynyň guramaçylyk ukyplarynyň öz-özüňe baha bermek arkaly ösdürilmegi” atly 3 günlük okuw sapagy öz işine başlady. Okuw sapaklary Migrasiýa boýunça Halkara Guramasynyň / BMG-niň Migrasiýa boýunça Agentliginiň Türkmenistandaky wekilhanasy (MHG), ABŞ-nyň Halkara Ösüş üçin Agentligi (USAID) we Ýewraziýa Gaznasynyň (ÝG) bilelikde guramagynda geçirilýär. Bu sapaklara Türkmenistanyň dürli künjeginde birnäçe ugurlarda öz işlerini alyp barýan jemgyýetçilik guramalary gatnaşýarlar. Gatnaşylaryň sanawy Türkmenistanyň Magtymguly adyndaky Ýaşlar guramasynyň, Zenanlar guramasynyň, Gyzylýarymaý milli jemgyýetiniň, Tebigaty goramak jemgyýetiniň, Körleriň we kerleriň jemgyýetiniň, “Keýik Okara”, “Ýeňme”, “Maşgala”, “Agama” we başga-da birnäçe jemgyýetçilik guramalarynyň wekillerinden ybarat.

MHG birnäçe ýyldan bäri Türkmenistanda adam söwdasyna garşy hereket etmek boýunça hereketleriň milli meýilnamasyny amala aşyrmakda ähmiýetli orny eýeleýän jemgyýetçilik guramalary bilen işjeň hyzmatdaşlyk edýär. Jemgyýetçilik guramalarynyň institusional mümkinçiliklerini güýçlendirmek bolsa olaryň üstünlikli işlemekleri üçin esasy komponentleriň biri bolup durýär. Häzriki okuw sapaklary Türkmenistanyň öňde baryjy jemgyýetçilik guramalaryna öz-özüňi ösdürmekde peýdaly boljak öz-özüňe baha bermegiň usullaryny öwrenmäge mümkinçilik berýär.

Guramaçylygy ösdürmegiň komponentleri strategiki meýilnamalaşdyryş, netijeli dolandyryş ulgamy we göz öňünde tutlýan toparlaryň zerurlyklaryna düşünmek, göz öňünde tutlýan toparlar üçin önümleriň we hyzmatlaryň hilini ýokarlandyrýan ülňüleri girizmek, işgärleri we meýletinçileri taýýarlamak we ösdürmek, şeýle-de maliýe durnuklylygyny güýçlendirmekden ybarat. Netijeli aragatnaşyk we abraýy berkitmek, döwlet edaralary, hyzmatdaşlar we işewürler bilen hyzmatdaşlygy gurmak hem guramaçylyk ukybynyň möhüm bölekleri hasaplanýar. Okuw sapaklary tamamlanandan soňra jemgyýetçilik guramalary öz-özüňe baha bermegiň usullary bilen tanyş bolup, özleriniň guramaçylygyny güýçlendirmek üçin alnyp baryljak işleriň ugurlaryny kesgitlemek we geçiriljek çäreleri meýilnamalaşdyrmak mümkinçiliklerine eýe bolarlar.

Guramaçylygy ösdürmek ulgamynyň halkara hünärmeni Aleksandr Lýambertiň (Belarus Respublikasy) bellemegine görä:

“Içerki potensialy bahalandyrmak we ösdürmek, maksatlaryna çalt we netijeli ýetmek isleýän islendik guramanyň ýolbaşçylarynyň işiniň aýrylmaz bölegidir. Wezipeleri hemişe wajyp jemgyýetçilik meselelerini çözmäge gönükdirilen jemgyýetçilik guramalarynyň ýolbaşçylary üçin bolsa bu has hem möhüm bolup, olaryň işleri aýan we täsirli bolmalydyr. Häzirki geçirilýän okuw sapagy jemgyýetçilik guramalarynyň ýolbaşçylaryna guramaçylygy ösdürmek barada, ol nähili ýagdaýda we näme maksat bilen amala aşyrylýandygy barada, guramaçylyk potensialynyň instusional usuly barada düşünje bermek, şeýle-de meýilnamalaşdyrmak we jemgyýetçilik guramasynyň işini kämilleşdirmegiň dürli usullaryny ara alyp maslahatlaşmagagönükdirlen. Okuw sapagynyň beýle ýagdaýda geçirilmegi, ýagny sapagy alyp baryjylaryň biri we toparyň bir bölegi wideo aragatnaşyk arkaly gatnaşsa, ikinji alyp baryjy bilen toparyň beýleki bölegi okuw otagynda bolsa, bu gatnaşyjylar üçin biraz çylşyrymly we kyn bolup bilýär. Bu okuwy guraýjylar toparyna çeýeligi, gaýduwsyzlygy we ussatlygy üçin sag bolsun aýdýaryn we geljekki işlerinde üstünlik arzuw edýärin”.

Türkmenistanyň Magtymguly adyndaly Ýaşlar guramasynyň Halkara hyzmatdaşlyk bölüminiň baş hünärmeni Aýşirin Orazberdiýewa: “Türkmenistanyň Ýaşlar guramasy Türkmenistanda ýaşlar baradaky döwlet syýasatynyň 2021-2025-nji ýyllar üçin Döwlet maksatnamasyny işjeň durmuşa geçirýär. Ýurdumyzyň ýaşlary ýurdumyzdaky halkara guramalarynyň wekilhanalarynyň guraýan çärelerine gatnaşyp, olar bilen işjeň hyzmatdaşlyk edýärler. Bugün Türkmenistandaky jemgyýetçilik guramalarynyň wekilleri bilen agzybirlikde “Türkmenistanyň jemgyýetçilik guramalarynyň guramaçylyk ukyplarynyň öz-özüňe baha bermek arkaly ösdürilmegi” atly okuw sapagyna gatnaşýarys. Üç günlük okuw sapagynyň netijeli we peýdaly boljakdygyna ynanýarys, hem-de sapakda alan bilimimizi öz guramalarymyzda ulanmagy meýilleşdirýäris”.

“Bugünki okuw sapagynyň dowamynda oňa gatnaşyjylaryň öz tejribelerini paýlaşmaga we olary ara alyp maslahatlaşmaga taýýardyklaryna şaýat bolduk. Bu ýagdaý okuw sapagynyň sazlaşykly hem işjeň bolmagyna ýardam edýär we Türkmenistandaky jemgyýetçilik guramalarynyň arasynda geljekde guramaçylygy ösdürmäge bolan gyzyklanmanyň we zerurlygyň bardygynyň alamaty bolup durýar. MHG, Ýewraziýa Gaznasy we USAID tarapyndan guralan bu okuw sapagy ilkinji bolup, onuň gelejkde has ähmiýetli strateigiki hyzmatdaşlyk boljagyna ynanýarys.” diýip, MHG-nyň Türkmenistandaky wekilhanasynyň başlygy Azat Atajanow aýtdy.

Okuw sapagy iýun aýynyň 1-3-ne “Ýyldyz” myhmanhanasynyň mejlisler zalynda geçiriler.