Türkmenistanyň futbol çempionatynyň ýakynda tamamlanan möwsüminde iki futbolçy poker, bir futbolçy het-trik we 16 futbolçy dubl etmegi başardy.

Möwsümiň pokerçileri (bir duşuşykda dört pökgi geçirip bilen futbolçylar) Altymyrat Annadurdyýew bilen Myrat Ýagşyýewdir. Möwsümiň iň netijeli futbolçysy Altymyrat Annadurdyýewiň bu baaşrnygy iki duşuşykda ― 12-nji we 26-njy tapgyrlarda görkezendigini aýratyn aýtmak gerek. Myrat Ýagşyýew bolsa 27-nji tapgyryň duşuşygynda dört pökgi geçirdi.

24-nji tapgyrda üç gezek tapawutlanan Altymyrat Annadurdyýew möwsümde het-trik eden ýeke-täk futbolçydyr.

Ýokarda-da ýazyşymyz ýaly, jemi 16 futbolçy bir duşuşykda iki gezek tapawutlanmagy başardylar. Bu sanawda hem iň ýokary görkeziji Altymyrat Annadurdyýewe degişli. Ol möwsümde jemi 6 duşuşykda (6, 14, 19, 20, 22 we 23-nji tapgyrlarda) iki pökgüden geçirdi. Elman Tagaýew bilen Yhlas Magtymow bolsa üç duşuşykda şeýle netijäni görkezen futbolçylar boldy.

Sanawda bulardan başga-da, «Aşgabatdan» Boris Iwanow (5-nji tapgyr), Myrat Amantaganow (24-nji tapgyr), Nazar Towakelow (26-njy tapgyr), «Merwden» Perman Hallyýew (10-njy tapgyr), Pirmyrat Gazakow (16-njy tapgyr), «Ahaldan» Pirmyrat Sultanow (13-nji tapgyr), «Altyn asyrdan» Begenç Akmämmedow (14-nji tapgyr), Mihail Titow (17-nji tapgyr), «Şagadamdan» Baýramgeldi Nurlyýew (14-nji tapgyr), Hemra Amanmämmedow (7-nji tapgyr), «Energetikden» Rahmet Şermetow (16-njy tapgyr), «Nebittçiden» Alibek Abdyrahmanow (16-njy tapgyr), «Köpetdagdan» Döwletmyrat Seýitmuhammedow (22-nji tapgyr) dagylar bar.