Türkmenistanyň ýaş türgenleri Hytaýyň Harbin şäherinde geçirilen şort-trek boýunça Aziýanyň ýaşlar türgenleşik lagerine gatnaşdylar. Aziýanyň Olimpiýa geňeşi tarapyndan Konkide taýýanlaryň halkara birleşigi (ISU) bilen bilelikde guralan bu türgenleşik ýygnanyşygy Aziýa sebitiniň dürli ýurtlaryndan ýaş türgenleri we tälimçileri bir ýere jemledi.

«Türkmenistan: Altyn asyr» elektron gazetiniň habar bermegine görä, türgenleşiklere Türkmenistanyň şort-trek boýunça milli ýygyndysynyň baş tälimçisi Aýhanym Gulamalyýewanyň ýolbaşçylygynda Daňatar Muhamow we Merýem Hudaýgulyýewa gatnaşdylar. Türgenler bilen geçirilen okuw türgenleşiklerini ISU-nyň hünärmenleri, şol sanda halkara ýaryşlarynyň meşhur çempionlary we baýraklaryň eýeleri geçirdiler. Maksatnama tehniki ussatlygy ýokarlandyrmaga we türgenleri geljekki ýaryşlara taýýarlamaga gönükdirildi.

Okuw-türgenleşik ýygnanyşygy Aziýada gyşky sport görnüşlerini ösdürmek we ýaş türgenleri goldamak maksatnamasynyň çäklerinde geçirildi. Alnan taýýarlygyň türgenlere öňde boljak iri ýaryşlarda, şol sanda 2027-nji ýylda geçiriljek «Aziýanyň çagalary» oýunlarynda we 2029-njy ýylda Almaty şäherinde geçiriljek gyşky Aziýa oýunlarynda üstünlikli çykyş etmäge ýardam bermegine garaşylýar.

Mundan ozal, awgust aýynyň başynda Harbin şäherinde figuralaýyn taýmak boýunça hem şuňa meňzeş türgenleşik ýygnanyşygy geçirilipdi. Oňa Türkmenistanyň ýaş figuralaýyn taýyjylaryndan düzülen topar hem gatnaşdy.