«Arkadag» futbol klubynyň baş tälimçisi Mergen Orazow ýaryşdaky deslapky tapgyrda Hindistanyň «Goa» topary bilen geçiriljek duşuşygyň öňüsyrasynda geçirilen metbugat maslahatynda toparyň oýna taýýardygyny aýtdy.

«Taýýarlyk işleri diýseň kanagatlanarly geçdi. Bilşiňiz ýaly, taýýarlyk şu ýerde, Türkmenistanda geçirildi. Oýunçylar gowy sport ýagdaýynda we oýna fiziki taýdan hem taýýarlykly geldiler. Şonuň üçin bu duşuşyga taýýar diýip hasap edýäris» — diýip, Orazow aýtdy. Ol dowam edýän milli çempionatyň futbolçylaryň oýun taýýarlygyny saklamaga ýardam berýändigini we munuň topar üçin peýdalydygyny belledi.

Orazow klubyň Çempionlar ligasynyň ýaryşynyň toparçalaýyn tapgyryna çykmak üçin göreşmegi maksat edinýändigini aýtdy. «Ertirki duşuşykda ýeňiş gazanarys diýip umyt edýäris, soňra bolsa AFK-2 Çempionlar ligasynyň ýaryşynda toparçadan çykmagy maksat edinýäris. Klubymyz hemişe iň ýokary derejeli ýaryşlarda çykyş etmek üçin göreşýär we şol ýaryşlara taýýarlanýar. Şonuň üçin hem hut Çempionlar ligasynda çykyş etmek isleýäris we bu duşuşykda gowy netije gazanjakdygymyza umyt baglaýarys» — diýip, ol nygtady. 

Tälimçi düzümi täzelenen, tälimçiler topary çalşan we täze legionerler goşulan «Goa» kluby barada aýdyp, «Arkadagyň», ilkinji nobatda, öz oýnuna üns berýändigini belledi. «Biziň oýunçylarymyz biri-birine ýeterlik derejede öwrenişen. Topar uzak wagtdan bäri bilelikde — hem milli ýygyndyda, hem şu ýerde oýnaýar. Şonuň üçin, üstesine-de, öz meýdançamyzda oýnaýandygymyz üçin, biz, ilkinji nobatda, öz oýnumyza daýanýarys. Elbetde, garşydaşy seljerdik, onuň käbir taktiki aýratynlyklaryny göz öňünde tutduk we şoňa görä taýýarlyk gördük» — diýip, Orazow aýtdy.

Öňde boljak duşuşygyň hasabyny çaklamakdan saklanan tälimçi öz toparynyň ýeňiş gazanjakdygyna ynam bildirdi. Duşuşyk üçin taktiki meýilnama baradaky sowala jogap berende, ahyrky kararyň oýnuň gidişine bagly boljakdygyny aýtdy: «Biziň hemişe topa eýelik etmegi maksat edinýän ýörelgämiz ýok, ýöne diňe garşylyklaýyn hüjümlere daýanmak ýörelgämiz hem ýok. Oýunçylar haçan depgini saklamalydygyny, haçan bolsa, tersine, hüjüme geçmelidigini gowy duýýarlar. Elbetde, biz öz meýdançamyzda oýnaýarys, şonuň üçin öňe gitmeli we hüjüm etmeli».

«Arkadagyň» tälimçisi Şanazar Tirkişewiň we Altymyrat Annadurdyýewiň golaýda türgenleşiklere täzeden başlandyklaryny we eýýäm ýoldaşlyk duşuşyklaryna gatnaşandyklaryny hem habar berdi. Olaryň «Goa» bilen duşuşykda meýdança çykmagy klubyň lukmançylyk toparynyň kararyna bagly bolar.

«Arkadag» bilen «Goa» klublarynyň arasyndaky duşuşyk 12-nji awgustda «Arkadag» stadionynda geçiriler. Duşuşyk ýerli wagt bilen sagat 20:00-da başlanar. Giriş mugt.  Duşuşykda ýeňiş gazanan topar AFK-2 Çempionlar ligasynyň ýaryşynyň toparçalaýyn tapgyryna ýollanma alar. Ýeňlen topar bolsa halkara möwsümini AFK-nyň Çagyryş ligasynyň toparçalaýyn tapgyrynda dowam etdirer.

Duşuşygyň Türkmenistandaky göni ýaýlymyny «Belet» onlaýn platformasy üpjün eder.