Ýewropanyň howa gözegçiligi boýunça «Copernicus» gullugynyň habar bermegine görä, iýul aýynda Dünýä ummanynyň üstki gatlagynda gözegçilikleriň bütin taryhyndaky iň ýokary temperatura hasaba alyndy. Muňa bölekleýin ýagdaýda Ýuwaş ummanynda El-Ninýo hadysasynyň emele gelmegi hem täsir etdi.

Geçen aý polýar sebitleriň daşyndaky, ýagny demirgazyk we günorta giňişlikleriň 60-njy derejeleriniň arasyndaky ummanyň üstki gatlagynyň ortaça temperaturasy 20,96°C boldy. Bu görkeziji 2023-nji ýylda hasaba alnan öňki rekorddan — 20,89°C ýokarydyr. Geçen iýul dünýä derejesinde gözegçilikleriň ähli döwründäki iň yssy iýullaryň arasynda ikinji orny eýeledi: temperatura senagatlaşmadan öňki derejeden 1,47°C ýokary boldy.

Ýewropada iýul aýynda ummanyň üstki gatlagynyň temperaturasy Atlantik ummanynyň kenar ýakasynda we Ortaýer deňziniň günbatar böleginde rekord derejä ýetdi. Bu bolsa deňizdäki güýçli we aşa ýokary ýylylyk tolkunlarynyň ýaýramagyna şert döretdi. Ýuwaş ummanynyň tropiki zolagynda hem adatdan daşary ýokary temperaturalar saklandy. Bu sebitde El-Ninýo hadysasy ösmegini dowam etdirýär we çaklamalara görä, ýakyn aýlarda has-da güýçlenmegi mümkin.

Ummanyň suwlary parnik gazlarynyň zyňyndylarynyň netijesinde emele gelýän artykmaç ýylylygyň esasy bölegini özüne siňdirýär. Şonuň üçin ummanlaryň gyzmagy suwuň ýylylygynyň netijesinde giňelmegi sebäpli deňiz derejesiniň ýokarlanmagyna, şeýle hem merjen riflerine we deňiz ekoulgamlaryna zeper ýetirýän deňizdäki ýylylyk tolkunlarynyň has uzak dowam etmegine we güýçlenmegine getirýär.