Türkmenistanly alymlar şu gün Altaý ülkesiniň we Altaý Respublikasynyň çäginde başlanan «Uly Altaý: türki miras» atly giň gerimli etnografik ekspedisiýa gatnaşýarlar.

Gorno-altaisk.info neşiriniň habar bermegine görä, Altaý döwlet uniwersitetiniň «Uly Altaý» altaistik we türkologiýa ylym-bilim merkeziniň barlag toparynyň düzümine Gyrgyzystandan, Täjigistandan, Türkmenistandan we Özbegistandan gelen alymlar girdi. Ekspedisiýanyň bilelikdäki guramaçysy hökmünde Gorno-Altaý döwlet uniwersiteti çykyş edýär.

Etnograflar dürli etnik bileleşikleriň: kumandinleriň, çelkanslaryň, tubalarlaryň, altaýlylaryň we telengitleriň medeniýetini hem-de däp-dessurlaryny öwrenerler.

«Uly Altaýyň we Merkezi Aziýanyň köp sanly häzirki zaman türki dilli halklarynyň Altaýy öz taryhy watany hökmünde kabul etmegini saklap galmagy örän möhümdir. Etnografiýa ylmy hojalykda, ýaşaýyş jaýlarynda, eşiklerde, iýmitde, jemgyýetçilik gatnaşyklarynda, garyndaşlyk adalgalarynda we ynançlarda saklanyp galan medeni görnüşler arkaly bu baglanyşyklary yzarlamaga mümkinçilik berýär. Edil şu ýagdaý hem biziň ekspedisiýa taslamamyzy dürli ýurtlaryň alymlary üçin özüne çekiji edýär. Bu ýyl biziň ekspedisiýamyz iň giň köp milletli düzüme eýe boldy: topara bäş ýurtdan alymlar goşuldy» diýip, ekspedisiýanyň ýolbaşçysy Iwan Nazarow gürrüň berýär.

Ekspedisiýanyň ilkinji nokady Biýsk şäheri bolar, soňra alymlar Altaý Respublikasynyň Turoçak etrabynda ýaşaýan ýerli we az sanly halklaryň jemgyýetlerini öwrenmäge ugrarlar. Habarda bellenilişine görä, ugur soňra Ust-Kan we Ust-Kosa etraplarynda dowam eder.