Tbiliside geçirilen Türkmenistanyň Medeniýet günleriniň ýapylyş dabarasy boldy.

​Medeni çäre iki ýurduň muzeý hünärmenleriniň duşuşygy bilen başlandy. Onuň dowamynda hünär tejribeleri alşyldy we hyzmatdaşlygy ösdürmegiň geljekki ugurlary kesgitlenildi.

​Jemleýji günüň şowhunly wakasy hökmünde baýramçylyk konserti boldy.

​Türkmen artistleriniň gruzin aýdymlaryny ýerine ýetirmegi tomaşaçylarda uly täsir galdyrdy. Bu bolsa iki halkyň arasyndaky dostluk we özara hormat goýmak ýagdaýyny has-da dabaralandyrdy. Saz kompozisiýalary halkara hyzmatdaşlygynyň we medeni-ynsanperwer gatnaşyklaryň ösmeginiň nyşanyna öwrülip, Türkmenistanyň we Gruziýanyň ikitaraplaýyn gatnaşyklary pugtalandyrmaga bolan özara gyzyklanmasyny tassyklady.

​Türkmen artistleriniň, meşhur estrada aýdymçylarynyň, tans we folklor toparlarynyň çykyşlary tomaşaçylar tarapyndan uly şowhun bilen garşylandy. Konsertiň jemleýji pursadynda ähli gatnaşyjylaryň bilelikde ýerine ýetiren ruhubelent aýdymy tomaşaçylaryň ýadynda galdy.