Zehinli çagalaryň «Garaşsyzlygyň merjen däneleri» atly bäsleşiginiň jemleýji döwlet tapgyryny guramaçylykly geçirmek boýunça zerur işler alnyp barylýar. Bu barada şu gün sanly ulgam arkaly geçirilen Ministrler Kabinetiniň mejlisiniň dowamynda wise-premýer B.Mämmedowyň hasabatynda bellenildi.

«Watan» habarlar gepleşiginde habar berlişi ýaly, ýaş nesliň döwrebap bilim-terbiýe almagy hem-de sungat ussatlarynyň ýoluny mynasyp dowam etmek üçin giň mümkinçilikler döredilýär. Şunuň bilen baglylykda, bu bäsleşik ýaş nesillerde sungat älemine söýgini döretmekde, olaryň zehin-başarnyklaryny ýüze çykarmakda uly ähmiýete eýedir. Bäsleşigiň tapgyrlarynda Garaşsyz, baky Bitarap Türkmenistany, ajaýyp döwri wasp edýän aýdym-sazlary ýokary ussatlyk bilen ýerine ýetirmekde tapawutlanan aýdymçy çagalaryň 21-si, çagalar tans, aýdym-saz we halk döredijilik toparlarynyň 14-si döwlet tapgyryna gatnaşmaga hukuk gazandylar. Şunuň bilen baglylykda, döwlet Baştutanynyň garamagyna degişli teklip hödürlenildi.

Türkmenistanyň Prezidenti hasabaty diňläp, wise-premýere zehinli çagalaryň «Garaşsyzlygyň merjen däneleri» atly bäsleşiginiň jemleýji döwlet tapgyryna gowy taýýarlyk görmegi we ýokary derejede geçirmegi tabşyrdy.