ABŞ-nyň Zikgehanasy ýurduň täze taryhynda ilkinji gezek «Azatlygyň sesi – Azatlygyň jaňy» diýen tegelek däl görnüşli şaýy pul çykarar. Bu barada Zikgehananyň metbugat gullugyna salgylanýan TASS habar berdi.

Habarda jaň görnüşli puluň ABŞ-nyň esaslandyrylmagynyň 250 ýyllygyna gabatlanýandygy bellenýär. Puluň ýüz tarapynda jaýrykly jaň we «Liberty» diýen ýazgy, 1776 - 2026 diýen sene hem-de «Ýaradana umyt baglaýarys» diýen şygar ýerleşdiriler. Arka ýüzünde feýerwerkiň ýagtysynda Independens-holl, «Amerikanyň Birleşen Ştatlary» diýen ýazgy, latyn dilinde «Köplükden  - bitewülige» diýen şygar şekillendiriler.

Ýadygärlik şaýy pullaryň çykarylmagy ABŞ-da köpden bäri dowam edýän däpdir. Ýurduň taryhynda iň meşhur şaýy pul Azatlyk heýkeline bagyşlanyp 1986-njy ýylda çykarylan hem-de 15,5 million nusgalykda satylan pul boldy.