Aşgabatdaky Eýran Yslam Respublikasynyň ilçihanasynyň Medeniýet merkezinde çeperçilik bäsleşiginiň ýeňijilerini sylaglamak dabarasy we eýran milli aşhanasy baradaky kitabyň türkmen diline terjime edilen görnüşiniň tanyşdyrylyş dabarasy geçirildi. Bu barada «Türkmenistan: Altyn asyr» elektron gazeti habar berýär.

​Çärä türkmen suratkeşleri, hünär ussatlary we höwesjeňler gatnaşdylar.

​Duşuşygyň dowamynda Eýranyň Türkmenistandaky ilçisi Ali Mujtaba Ruzbehani, medeniýet meseleleri boýunça geňeşçi Abdulreza Abbasi we Türkmenistanyň Suratkeşler birleşiginiň başlygy Çarymyrat Ýazmyradow çykyş etdiler.

​Agşamyň esasy wakasy iki ýurduň arasyndaky dostluk we doganlyk gatnaşyklaryna bagyşlanan çeperçilik bäsleşiginiň jemini jemlemek boldy. Bäsleşige 50-den gowrak nakgaşçylyk eseri hödürlendi. Ýokary baha bermek üçin abraýly eminler topary hünär ussatlarynyň we höwesjeňleriň işlerine aýry-aýry ugurlarda baha berdiler.

​Iki topar boýunça hem üç sany esasy ýeňiji kesgitlendi. Mundan başga-da, guramaçylyk topary iň gowy döredijilik eseri üçin iki sany ýörite baýragy hem gowşurdy. Ýeňijilere Hormat hatlary we pul baýraklary gowşuryldy, bäsleşige gatnaşanlaryň ählisine ýadygärlik diplomlar berildi.

​Dabaranyň ýatda galyjy pursatlarynyň biri hem eýran milli aşhanasy baradaky kitabyň türkmen diline terjime edilip, okyjylara ýetirilmegi boldy. Täze kitapda eýran halkynyň 100-den gowrak milli tagamlarynyň taýýarlanylyş usullary öz ornuny tapdy.