YouTube ilkinji gezek ulanyjylaryň her gün platformada geçirýän ortaça wagty boýunça Netflix-den öňe geçdi. Geçirilen gözlegiň netijelerine görä, 2025-nji ýylda dünýä boýunça ulanyjylar YouTube kanallaryndaky mazmuna günde ortaça 99 minut sarp eden bolsalar, Netflix-de bu görkeziji 93 minut bolupdyr.

Mundan bir ýyl öň bu ugurda liderlik Netflix-e degişlidi.

«Digital i» barlag kompaniýasynyň «The YouTube Era: 2025 in Review» atly hasabatynda bellenilişine görä, bir ýylyň dowamynda YouTube-daky gündelik ortaça tomaşa wagty 87,2 minutdan 99,1 minuta çenli ýokarlanypdyr. Şol bir wagtyň özünde Netflix-de bu görkeziji 100,5 minutdan 93,4 minuta çenli peselipdir. Maglumatlar soňky iki ýylyň dowamynda dünýäniň 20 ýurdunda geçirilen ölçeglere esaslanýar.

Bilermenleriň bellemegine görä, gatnaşygyň artmagy YouTube ulanyjylarynyň noutbuklardan we telefonlardan telewizorlara geçmegi bilen baglanyşyklydyr. 2025-nji ýylyň ahyryna çenli YouTube tomaşalarynyň telewizorlar arkaly görýänleriň paýy 35%-e ýetipdir. Bu görkeziji 2024-nji ýylyň başynda 28% bolupdy. Şol döwürde ykjam enjamlaryň paýy bolsa 35%-den 31%-e çenli azaldy.

Platformanyň iň işjeň ulanyjy topary Z nesli bolmagynda galýar. Bu nesliň wekilleri YouTube-da günde ortaça 111 minut wagt geçirýärler. Şeýle-de, iň uly ösüş 55–64 ýaş aralygyndaky erkekleriň arasynda hasaba alyndy — olaryň gatnaşyk derejesi ýylyň dowamynda 15% ýokarlandy.

Ýurtlaryň arasynda YouTube kanallaryna iň köp wagt sarp edýän ulanyjylar Günorta Koreýadadyr — olar günde ortaça 161,5 minut tomaşa edýärler. Görkezijiniň iň uly ösüşi bolsa Fransiýada hasaba alyndy we ol 33,6%-e deň boldy.

Şol bir wagtyň özünde Netflix-iň YouTube-daky resmi kanaly ähli kanallaryň arasynda iň uly gurşawy saklap galdy — onda 78,2 million aýratyn akkauntlar bar.