14-nji iýunda Türkmenistanyň Daşary işler ministrliginiň Halkara gatnaşyklary institutynda Ýaponiýanyň Bilim, medeniýet, sport, ylym we tehnologiýalar ministrliginiň (MEXT) maksatnamasy boýunça synaglar geçiriler.

Ýaponiýanyň Türkmenistandaky ilçihanasynyň resmi saýtynda habar berilmegine görä, synaga diňe öňürti ilçihana resmi ýagdaýda arza tabşyran dalaşgärler gatnaşyp bilerler. Synaglar aşakdaky ugurlar boýunça geçiriler: Talyp-gözlegçi (Research students) (tebigy we jemgyýetçilik ylymlary); Talyp (Undergraduate students) (jemgyýetçilik ylymlary); Talyp (Undergraduate students) (tebigy ylymlar); Tehnologik institutyň talyby (National Institute of technology students); Ýöriteleşdirilen kollejiň talyby (Specialized training college students).

Synaglaryň geçiriliş tertibi barada giňişleýin maglumaty ilçihananyň saýtyndan alyp bilersiňiz.

MEXT — daşary ýurtly talyplaryň Ýaponiýanyň ýokary okuw mekdeplerinde bilim almagyny maliýe taýdan üpjün edýän talyp hakly döwlet maksatnamasydyr. Ol bakalawriatdan başlap, ylmy-gözleg maksatnamalaryna çenli bilimiň dürli basgançaklaryny öz içine alýar.