Türkmen erkin göreşijisi Şaapbas Esgerow Wýetnamyň Danang şäherinde ýetginjekleriň arasynda geçirilen Aziýa çempionatynda bürünç medala mynasyp boldy. Türgen 80 kilograma çenli agram derejesinde çykyş etdi.

Üçünji orun ugrunda geçirilen tutluşykda Şaapbas Esgerow ýaponiýaly pälwan Ýuseý Nagatany 9:3 hasabynda ýeňip, bürünç medala eýe boldy.

Final duşuşygynda eýranly pälwan Amirali Mohammad Ferasati hindistanly Mandip Mandipi 10:0 hasabynda ýeňip, altyn medala mynasyp boldy. Beýleki bürünç medaly gazagystanly türgen Adilbek Erbolatow täjigistanly Nasim Hojaýewden 12:1 hasabynda üstün çykyp eýeledi.

Bu ýaryşda Türkmenistanyň ýygyndy toparynyň düzüminde jemi 10 türgen çykyş etdi. Olaryň 6-sy erkin göreşde, 4-si bolsa grek-rim göreşinde güýç synanyşdy.