«Zehinli bäsleşik» interaktiw bäsleşigi 21-nji maýdan başlap gatnaşyjylary üçin yzygiderli baýraklar ulgamyny işe girizýär. Hepdelik we aýlyk bäsleşikleriň ýeňijileri öz bilimleri hem-de işjeň gatnaşandyklary üçin gymmat bahaly sowgatlary almak mümkinçiligine eýe bolarlar.

Bäsleşigiň şertlerine laýyklykda, her hepdedäki gyzgalaňly ýaryşyň jemleri boýunça bäsleşigiň iň işjeň gatnaşyjylarynyň arasynda kiçi baýraklar ugrunda bäsleşik geçiriler. Mundan başga-da, her aýyň ahyrynda guramaçylar jemleri jemläp, öňdebaryjy zehinleri mynasyp bolan uly baýraklar bilen sylaglarlar.

Bäsleşige gatnaşmak, täze sowallary bilmek, baýraklar barada maglumat almak we ähli funksiýalardan doly peýdalanmak üçin ulanyjylaryň «Zehinli bäsleşik» mobil goşundysyny iň soňky nusgasyna çenli täzelemelidigi habar berilýär.

Ýeňijileri kesgitlemegiň esasy şerti — bäsleşigiň soraglaryna berlen dogry jogaplaryň sany bolar. Gatnaşyjy näçe köp dogry jogap berse, onuň hepdelik ýa-da aýlyk baýrakly bäsleşiklerde ýeňiş gazanmak mümkinçiligi şonça-da ýokary bolar.

Türkmenistanyň Magtymguly adyndaky Ýaşlar guramasynyň Merkezi Geňeşiniň «Arkadagly ýaşlar» elektron žurnalynyň abunaçylary «Zehinli bäsleşik» atly bu ajaýyp interaktiw bäsleşige gatnaşmaga hukuk gazandylar.

Bäsleşigiň mobil goşundysyny meşhur «Google Play» we «App Store» onlaýn dükanlaryndan mugt ýükläp alyp bolýar, bu bolsa Android we iOS ulgamlaryndaky smartfon ulanyjylary üçin bäsleşige gatnaşmagy has aňsat we amatly edýär.

Bäsleşige gatnaşmak üçin «Arkadagly ýaşlar» elektron neşirine abuna ýazylmak talap edilýär. Abunalyk abuna.yashlar.gov.tm resmi saýty arkaly, şeýle hem «Arkadagly Ýaşlar e-žurnaly» mobil goşundysynyň üsti bilen resmileşdirilýär.

Ulanyjylaryň resmi abuna.yashlar.gov.tm saýtyndaky awtorizasiýasy ykjam telefon belgisi we bir gezeklik kod arkaly amala aşyrylýar, bu bolsa ulgama girmegiň howpsuzlygyny we aňsatlygyny üpjün edýär.

Guramaçylar Türkmenistanyň ýaşlaryny bäsleşige işjeň gatnaşmaga, öz bilimlerini barlap görmäge we gymmat bahaly baýraklar ugrunda bäsleşmäge çagyrýarlar.