Beýik Watançylyk urşunda gazanylan Ýeňşiň 81 ýyllygy mynasybetli guralan dabaraly konsert Aşgabadyň Magtymguly adyndaky Milli sazly drama teatrynda 750-den gowrak adamy bir ýere jemledi. Çäre Russiýanyň Türkmenistandaky ilçihanasynyň hem-de ýurduň Medeniýet ministrliginiň ýardam bermeginde geçirildi.

Konserte gelen tomaşaçylaryň arasynda Russiýanyň diplomatik korpusynyň wekilleri, Türkmenistanda akkreditirlenen diplomatik wekilhanalaryň işgärleri, paýtagtyň ýaşaýjylary we myhmanlary bar.

Türkmenistanyň Döwlet simfoniki orkestri (baş dirižýor Resul Gylyjowyň ýolbaşçylygynda) solistler, Döwlet hory, Döwlet çagalar hory we A.S.Puşkin adyndaky bilelikdäki türkmen-rus mekdebiniň hory bilen bilelikde uruş ýyllarynyň meşhur aýdymlaryny ýerine ýetirdiler. Konsert «Mukaddes uruş» («Священная война») aýdymy bilen açyldy, şeýle hem «Durnalar» («Журавли»), «Gara gije» («Тёмная ночь»), «Esgeriň aýdymy» («Песня солдата») we beýleki eserler ýaňlandy.

Nomerleriň arasyndaky arakesmelerde uruş döwrüniň lybaslaryny geýen artistler we A.S.Puşkin adyndaky bilelikdäki türkmen-rus mekdebiniň okuwçylary frontçularyň hakyky hatlaryny hem-de uruş baradaky goşgulary okadylar. Konsert «Katýuşa» we «Ýeňiş güni» («День Победы») aýdymlary bilen tamamlandy — jemleýji aýdymy tutuş zal aýag üstünde durup bilelikde aýtdy, soňky akkordlar bolsa dowamly el çarpyşmalara garylyp gitdi. Çäre, takmynan, iki sagat dowam etdi.

Russiýanyň Türkmenistandaky Adatdan daşary we Doly ygtyýarly ilçisi Iwan Wolynkin minnetdarlyk sözi we gutlag bilen çykyş etdi.

Beýik Watançylyk urşy ýyllarynda söweş hereketlerine 300 müň türkmenistanly gatnaşdy, olaryň 130 müňi orden we medallar bilen sylaglandy, 104-si Sowet Soýuzynyň Gahrymany adyna mynasyp boldy, 15-si bolsa «Şöhrat» ordeniniň doly kawaleri boldy.