Aşgabatda 2026-njy ýylyň 21–23-nji oktýabry aralygynda geçiriljek «Türkmenistanyň nebit we gazy – OGT 2026» atly 31-nji Halkara maslahat we sergä hasaba alyş resmi taýdan açyldy. Çäräniň şygary: «Energiýa. Hyzmatdaşlyk. Ösüş.»

Geljekki forum OGT 2025 çäresiniň üstünlikli geçirilmeginiň dowamydyr. Oňa 70 ýurtdan 1400-den gowrak wekiller, 100-den gowrak kompaniýa gatnaşyp, şeýle-de 80-e golaý ýokary derejeli çykyşçylar we moderatorlar gatnaşdy. Bu görkezijiler çäräniň Ýewraziýa sebitinde öňdebaryjy halkara energetika meýdançalarynyň biri hökmünde ähmiýetini ýene-de bir gezek subut etdi.

OGT 2026-nyň esasy mowzugy Galkynyş gaz käniniň mundan beýläk ösdurilmegi bolar. Hususan-da, ýylda goşmaça 10 milliard kub metr gaz öndürmäge mümkinçilik berýän IV tapgyryň durmuşa geçirilmegine aýratyn üns berler. Şeýle-de, TAPI gaz geçirijisi taslamasy, Hazar deňziniň türkmen bölegindäki deňiz känleriniň özleşdirilmegi, gazy monetizasiýa etmek, gazhimiýanyň ösüşi, sanlylaşdyrma, metan zyňyndylarynyň azaldylmagy, energiýa netijeliliginiň ýokarlandyrylmagy, şeýle hem wodorod energetikasy we gaýtadan dikeldilýän energiýa çeşmeleri ýaly ugurlar ara alnyp maslahatlaşylar.

Çäräniň maksatnamasy ýokary derejeli plenar mejlisi, ministrler derejesindäki tegelek stol, kompaniýalaryň ýolbaşçylarynyň gatnaşmagynda geçiriljek pikir alyşmalar, tematiki pudaklaýyn sessiýalar, B2B we B2G görnüşindäki işewür duşuşyklar, şeýle-de 100-den gowrak kompaniýanyň gatnaşmagynda halkara sergini öz içine alýar.

OGT 2026 çäresiniň giň halkara gatnaşygy özüne çekmegine, täze hyzmatdaşlyk mümkinçilikleriniň döredilmegine, maýa goýumlarynyň çekilmegine we Türkmenistanyň energetika pudagynda tehnologik hyzmatdaşlygyň ösdürilmegine ýardam bermegine garaşylýar. Hasaba alyş OGT 2026 resmi web sahypasynda açykdyr.