Türkmenistanyň wekiliýeti Daşkentde geçirilen Merkezi Aziýa döwletleriniň Kärdeşler arkalaşyklarynyň geňeşiniň ýygnagyna gatnaşdy. Bu barada Özbegistanyň Kärdeşler arkalaşyklary federasiýasynyň metbugat gullugy habar berdi.

Mejlisiň dowamynda geňeşi konfederasiýa öwürmek baradaky kararyň kabul edilendigi bellenilýär.

Gazagystan, Gyrgyzystan, Täjigistan, Mongoliýa we Özbegistan täze konfederasiýanyň agzalary boldular, Türkmenistan özünde synçy derejesini saklap galdy. Mejlisiň dowamynda guramanyň tertipnamasy tassyklanyldy.

«Geňeşiň konfederasiýa öwrülmeginiň guramamyzyň derejesini ýokarlandyrjakdygyna, halkara guramalary hem-de halkara kärdeşler arkalaşyklary birleşikleri bilen gatnaşyklarda oňa doly bahaly we doly hukukly subýekt derejesini berjegine ynanýaryn» — diýip, täze düzümiň baş sekretarlygyna saýlanan Özbegistanyň Kärdeşler arkalaşyklary federasiýasynyň başlygy Kudratilla Rafikow belledi.

Mejlise gatnaşyjylar bäş agza ýurduň her birinden üç wekilinden ybarat, jemi 15 adamdan ybarat konfederasiýanyň baş geňeşini, şeýle hem düzümine milli kärdeşler merkezleriniň ýolbaşçylary girýän ýerine ýetiriji komiteti kemala getirdiler.

Merkezi Aziýa döwletleriniň Kärdeşler arkalaşyklarynyň geňeşi 2021-nji ýylyň noýabrynda Özbegistanyň we Gazagystanyň kärdeşler arkalaşyklary federasiýalarynyň başlangyjy bilen döredilipdi.