Türkmenistanyň futbol çempionatynyň dördünji tapgyrynda «Arkadag» toparynyň futbolçylary «Şagadam» toparyny 3:2 hasabynda ýeňdiler. Bu duşuşyk häzirki çempion üçin şu möwsümde Arkadag şäherindäki öý meýdançasynda geçirilen ilkinji oýun boldy.

Ýeňijileriň düzüminde Didar Durdyýew iki pökgi geçirdi (4-nji we 38-nji minutlarda), ýene bir pökgini bolsa Şamämmet Hydyrow (75-nji minutda) öz adyna ýazdyrdy. «Şagadam» toparynda bolsa iki pökgini hem Serdar Gulyýew geçirdi (45-nji we 61-nji minutlarda, ikinjisi – penalti urgusyndan).

Bu ýeňşiniň netijesinde «Arkadag» topary 12 utuk toplap, Ýokary liganyň ýaryş tertibinde ýekelikde öňdeligi eýeledi. 9 utukly «Şagadam» ikinji orunda barýar, ilkinji üçlügi bolsa 6 utuk bilen «Altyn Asyr» topary jemleýär, ýöne onuň ätiýaçda bir oýny bar.

Mundan öň Wladimir Baýramowyň tälim berýän topary paýtagtdaky «Aşgabat» stadionynda iki öý oýnuny geçirip, «Merw» toparyny 7:1 hasabynda uly hasap bilen ýeňdi we «Ahal» toparyndan 1:0 hasabynda üstün çykdy.

4-nji tapgyryň 22-nji aprelde geçiriljek beýleki oýunlarynda «Köpetdag» «Nebitçi» bilen duşuşar, «Merw» «Aşgabat» toparyny kabul eder, «Ahal» bolsa «Altyn Asyr» bilen güýç synanyşar.