Madridiň «Atletiko Madrid» kluby hem-de Fransiýanyň «Pari Sen-Žermen» topary Çempionlar ligasynyň çärýek finalynyň jogap duşuşyklarynyň netijesinde ýarym finala çykdy.

«Atletikonyň» futbolçylary Barselona toparyndan 1:2 hasabynda utulsa-da, iki duşuşygyň jemi boýunça ýarym finala çykmagy başardy. Duşuşyk «Metropolitano» stadionynyň meýdançasynda geçirildi.

«Barselonanyň» düzüminde gollary Lamin Ýamal (4-nji minut) we Ferran Torres (24-nji minut) geçirdi. Madridiň toparynyň ýeke-täk pökgüsini Ademola Lukman 31-nji minutda derwezä girizdi. 79-njy minutda «Barselonanyň» goragçysy Erik Garsiýa meýdançadan çykaryldy.

«Atletiko» bilen «Barselonanyň» arasynda ilkinji duşuşyk «Kamp Nou» stadionynda geçirilip, madridlileriň 2:0 hasabyndaky ýeňşi bilen tamamlandy.

Şol bir wagtda geçirilen başga bir duşuşykda «Pari Sen-Žermen» topary «Liwerpul» klubyny Enfild stadionynda 2:0 hasabynda ýeňdi. Iki pökgüni hem fransuz hüjümçisi Usman Dembele geçirdi — ol 72-nji minutda hem-de goşmaça wagtda (90+1) tapawutlandy.

«PSŽ» bilen «Liwerpulyň» arasynda ilkinji duşuşyk Parižde geçirilip, ol hem fransuz klubynyň 2:0 hasabyndaky ýeňşi bilen tamamlanypdy.

Ýarym finalda «Atletiko» Londonyň «Arsenal» bilen Lissabonyň «Sporting» toparlarynyň arasyndaky jübütiň ýeňijisi bilen duşuşar. PSŽ-niň garşydaşy bolsa Mýunheniň «Bawariýa» hem-de Madridiň «Real Madrid» toparlarynyň arasyndaky jübütiň ýeňijisi bolar.