Şu gün Türkmenistanyň Prezidenti Serdar Berdimuhamedow Aziýanyň Olimpiýa Geňeşiniň Baş direktory, Sportuň suwdaky görnüşleri boýunça Bütindünýä guramasynyň prezidenti Hüseýin Al-Musallamy kabul etdi. Bu barada "Watan" habarlar gepleşiginde habar berildi.

Bellenilişi ýaly, myhman wagt tapyp kabul edendigi üçin Prezident Serdar Berdimuhamedowa hoşallyk bildirip, Türkmenistanyň sporty ösdürmek boýunça tagallalaryna Aziýanyň Olimpiýa Geňeşiniň ýokary baha berýändigini aýtdy. Şeýle hem ol Olimpiýa hereketini ösdürmäge, halkara derejeli türgenleri ýetişdirmäge berýän goldawlary üçin Türkmenistanyň Prezidentine hoşallygyny beýan etdi.

Prezident Serdar Berdimuhamedow myhmany mähirli mübärekläp, onuň bu saparynyň Türkmenistan bilen Aziýanyň Olimpiýa Geňeşiniň arasyndaky hyzmatdaşlygy mundan beýläk-de ösdürmäge itergi berjekdigini aýtdy.

Duşuşygyň barşynda bedenterbiýäni we sporty ösdürmegiň hem-de bu ugurda giň halkara hyzmatdaşlygy alyp barmagyň Türkmenistanyň döwlet syýasatynyň ileri tutulýan ugurlarynyň biridigi bellenildi.

Ýapyk binalarda we söweş sungaty boýunça V Aziýa oýunlarynyň, Beýik Ýüpek ýolunyň ugry boýunça "Amul – Hazar 2018" halkara awtorallisiniň, şeýle hem Agyr atletika boýunça dünýä çempionatynyň Türkmenistanda üstünlikli geçirilendigi mysal hökmünde görkezildi. Şeýle hem Türkmenistanyň başlangyjy bilen 2018-nji ýylda BMG-niň Baş Assambleýasynyň her ýylyň 3-nji iýunyny "Bütindünýä welosiped güni" diýip yglan etmek barada kabul eden Kararnamasynyň ähmiýeti nygtaldy.

Söhbetdeşler Türkmenistanda sportuň suwdaky görnüşlerini ösdürmegiň meselelerini hem ara alyp maslahatlaşdylar.

Duşuşygyň ahyrynda Prezident Serdar Berdimuhamedow Türkmenistan bilen Aziýanyň Olimpiýa Geňeşiniň arasyndaky hyzmatdaşlygy has-da ösdürmäge goşýan uly şahsy goşandy hem-de bu ugurda Türkmenistanyň başlangyçlaryna hemişe goldaw berýändigi üçin Aziýanyň Olimpiýa Geňeşiniň Baş direktory, Sportuň suwdaky görnüşleri boýunça Bütindünýä guramasynyň prezidenti Hüseýin Al-Musallama minnetdarlyk bildirip, oňa berk jan saglyk, alyp barýan işlerinde üstünlikleri arzuw etdi.