Döwletliler köşgünde guralan Täze ýyl dabarasynda bu ýerde terbiýelenýän çagalara hormatly Prezident Serdar Berdimuhamedowyň hem-de türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagyň adyndan sowgatlar gowşuryldy. Bu barada TDH habar berýär.
Bellenilişi ýaly, Döwletliler köşgünde terbiýelenýän çagalary Täze ýyl arçasynyň ýanynda Aýazbaba, Garpamyk we 2025-nji ýylyň nyşany garşyladylar. Dabara Mejlisiň, Halk Maslahatynyň hem-de degişli ministrlikleriň we jemgyýetçilik guramalarynyň wekilleri gatnaşdylar.
Çagalar myhmanlaryň öňünde konsert maksatnamasy bilen çykyş edip, özleriniň döredijilik ukyplaryny görkezdiler. Dürli yşyklar bilen ýalkym saçýan arçanyň ýanynda olar goşgy aýtdylar, tans etdiler hem-de Watany, hormatly Prezidenti, Täze ýyl baýramyny wasp edýän aýdymlary ýerine ýetirdiler.
Şeýle-de ýaşajyk zehinler Aýazbaba, Garpamyk we ertekileriň gahrymanlary bilen el tutuşyp, arçanyň daşyndan aýlanyp, çykyşlaryny tamamladylar.
Soňra çagalara döwlet Baştutany Serdar Berdimuhamedowyň hem-de türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagyň adyndan sowgatlar, şeýle hem olaryň döwrebap bilim almaklary üçin interaktiw okuw esbaplary gowşuryldy.
Döwletliler köşgünde terbiýelenýän çagalar özleri barada edilýän alada üçin hormatly Prezidente hem-de Gahryman Arkadaga hoşallyk bildirdiler, şeýle hem Täze ýyl mynasybetli gutlaglaryny we arzuwlaryny beýan etdiler.
