Türkmenistanda
1. Prezident Serdar Berdimuhamedow birinji «Merkezi Aziýa – Hytaý» sammitine gatnaşmak maksady bilen Hytaýa amala aşyran iki günlük iş saparyny tamamlap, Aşgabada dolandy. Saparyň dowamynda Türkmenistanyň Prezidenti HHR-niň Başlygy Si Szinpin bilen gepleşikler geçirdi, gepleşikleriň netijeleri boýunça hyzmatdaşlyk hakynda resminamalaryň nobatdaky tapgyryna gol çekildi. Türkmenistanyň Prezidenti sammitde çykyş etmek bilen birnäçe başlangyçlary öňe sürdi. Hususan-da, «Merkezi Aziýa – Hytaý» görnüşindäki köptaraply geňeşmeleriň usullaryny döretmegi, hytaý ugry boýunça tebigy gazy ibermek bilen bagly täze taslamalary amala aşyrmagy, Maryda Merkezi Aziýa ýurtlarynyň we HHR-niň Ýaşlarynyň forumyny guramagy teklip etdi we sammite gatnaşyjylary ulag hyzmatdaşlygynyň mümkinçiliklerini durmuşa geçirmäge çagyrdy.
2. Aşgabatda Pýatigorskiniň we Çerkesskiniň arhiýepiskopy Teofilaktyň hem-de Merkezi Aziýanyň mitropolitlik okrugynyň ýolbaşçysy Wikentiniň gatnaşmagynda ybadat amala aşyrylar. Ybadatlar Keramatly Nikolaý ybadathanasynda, Direliş kafedral soborynda we Keramatly Kiril we Mefodiý ybadathanasynda geçiriler.
3. 22-26-njy maýda Rumyniýada Türkmenistanyň Medeniýet günleri geçiriler. Çäreleriň geçiriljek ýeri Rumyniýanyň Buharest we Konstansa şäherleri bolar. Döredijilik çäresiniň çäklerinde 22-nji maýda Buharestde 2024-nji ýylda 300 ýyllygy bellenilýän Magtymguly Pyraga bagyşlanan maslahat geçiriler.
4. Türkmenistanyň Prezidenti Serdar Berdimuhamedow, Merkezi Aziýa ýurtlarynyň liderleri we HHR-niň Başlygy Si Szinpin bilen bilelikde Sian şäherindäki Dostluk seýilbagynda nar agaçlaryny oturtdylar. Dabara sammit tamamlanandan soňra geçirildi. Naryň ýöne ýere saýlanylmandygy bellenilýär. Hytaýdaky bu ösümlik agzybirligiň we uzak ömrüň nyşany hasaplanýar.
5. Magtymguly adyndaky milli sazly drama teatrynda «Mukam» skripkaçylar ansamblynyň esaslandyryjysy we onuň hemişelik ýolbaşçysy, Türkmenistanyň halk artisti Garold Neýmarkyň 85 ýaşynyň dolmagy mynasybetli ýubileý konserti geçirildi. «Mukam» skripkaçylar ansambly Türkmen milli konserwatoriýasynyň ýanyndaky ýörite sazçylyk mekdep-internatynyň skripka öwrenýän okuwçylary üçin Garold Isaakowiç Neýmark tarapyndan 40 ýyl mundan öň açylypdy. Şondan bäri ansambl Türkmenistanyň skripka mekdebiniň şöhratyny öz çäginden has uzaklara ýaýdy. Ansamblyň düzümi her ýyl täzelenýär: mekdep-internatynyň uçurymlary ony tamamlaýarlar, olaryň ýerlerini bolsa ýaş okuwçylar eýeleýärler.
Dünýäde
6. «Singapore Air» awiakompaniýasy hereket edýän 76 ýylyndan bäri rekord derejede ýyllyk girdeji gazandy we 8 aýlyk zähmet haky görnüşinde bonus tölemek bilen işgärlerini höweslendirmek kararyna geldi. «Singapore Air» awiakompaniýasynyň ýolbaşçylary şeýle etmek bilen, pandemiýanyň kyn döwründe çeken zähmetleri üçin işgärlerine minnetdarlyk bildirmek kararyna geldiler. Galyberse-de, bonus diňe ýönekeý işgärlere berler, kompaniýanyň ýolbaşçylary töleg almazlar.
7. «Belawiýa» 3-nji oktýabrdan başlap, Minskden Abu-Dabä uçuş maksatnamasyny ýola goýar. Uçuşlar sişenbe we şenbe günleri amala aşyrylar. Uçuşyň dowamlylygy 6 sagat 20 minuda deň bolar. Petekleriň bahalary bir tarapa 259 ýewrodan we iki tarapa uçuş üçin 443 ýewrodan başlanýar.
Sport habarlary
8. 3x3 basketbol boýunça Türkmenistanyň milli ýygyndysynyň tälimçiler düzümi 2024-nji ýylda Parižde geçiriljek Olimpiýa oýunlarynyň saýlama tapgyryna taýýarlyk görüp başlady. Toparyň baş tälimçisi Toýly Baýryýew Türkmenistanyň Milli basketbol ligasynyň klublaryna wekilçilik edýän ýedi oýunçyny Aşgabatdaky Olimpiýa şäherçesinde türgenleşik ýygnanyşygyna çagyrdy. Pariž-2024-iň çäklerinde geçiriljek 3x3 basketbol ýaryşynyň final tapgyry 30-njy iýuldan 5-nji awgust aralygynda geçiriler.
9. Merkezi Aziýa futbol assosiasiýasynyň çempionatynyň 20 ýaşa çenli ýaşlar ýygyndylarynyň arasynda geçiriljek oýunlara eminlik etmek üçin Türkmenistandan eminler çagyryldy. Çempionatda FIFA-nyň emini Arslan Goşşanow we FIFA-nyň emininiň kömekçisi Şageldi Hydyrow işlär. Oraz Mämmetgeldiýew ýaryşa inspektor hökmünde çagyryldy. Türkmenistan açylyş oýnuny 21-nji maýda Owganystanyň toparyna garşy geçirer.
10. Myrat Ýakşyýew Gyrgyzystanyň «Neftçi» toparynyň düzüminde ilkinji pökgüsini tora girizdi. Türkmenistanyň milli ýygyndysynyň futbolçysy Gyrgyzystanyň çempionatynyň 9-njy tapgyrynyň «OşMU-Aldiýer» toparyna garşy myhmançylykda geçirilen duşuşygyň 97-nji minutynda tapawutlanmagy başardy. Ýakşyýew Akram Umarowyň pasyndan soň ýer eýeleriniň derwezesine kellesi bilen pökgini girizdi. Bu gol «Neftçi» toparyna ýeňiş getirdi. 31 ýaşly türkmen hüjümçisi üçin bu «Neftçiniň» düzüminde geçiren dokuzynjy oýny boldy.
