«Kitçiniň» türkmenistanly ýarymgoragçysy Ruslan Mingazow 2022/23-nji ýyldaky möwsümde Gonkongyň Kubogynyň ýeňijisi boldy.

Sişenbe güni «Kitçi» ýaryşyň finalynda «Gonkong Reýnjers» bilen duşuşyp, garşydaşyny 7:1 hasabynda ýeňmegi başardy. Mingazow janköýerleriň arasyndan bu oýna tomaşa etdi. Sebäbi türkmenistanly oýunçy Gonkongyň çempionatynyň 18-nji tapgyrynda «Li Man Uorriors» bilen oýunda alan gyzyl karty sebäpli Kubogyň finalynda meýdança çykyp bilmedi.

Bu üstünlik Mingazow üçin şu möwsümdäki üçünji trofeýdir. Ol mundan ozal ýurduň çempiony hem-de Gonkong Senýor Şild kubogynyň eýesi bolupdy. Netijeli geçen möwsümde Mingazow Gonkongyň çempionatynyň 18 oýnuda meýdança çykyp, 17 gol geçirmegiň hötdesinden geldi.

Ýeri gelende bellesek, Ruslan Mingazow 2022-nji ýylyň mart aýynda erkin agent hökmünde «Kitçiniň» düzümine goşulypdy. «Kitçi» 2023-nji ýylyň başynda Mingazow bilen şertnamanyň 2025-nji ýyla çenli uzaldylandygyny mälim etdi. Häzirki wagtda oýunçynyň transfer bahasy 550 müň ýewro barabar hasaplanýar.

Şeýle-de okaň:

• Ruslan Mingazow «Kitçiniň» düzüminde Gonkongyň çempiony boldy
• Ruslan Mingazow «Kitçi» futbol kluby bilen täze şertnama baglaşdy