Soňky habarlar

Arhiw

Türkmenistanda «Türkmentel — 2022» atly XV halkara maslahaty geçirilýär, koreý filmleriniň görkezilişi geçirildi, Atatürküň ýadygärligine gül desselerini goýmak dabarasy

10:5211.11.2022
0
20075

1. Türkmenistanyň paýtagtynda telekommunikasiýalar, maglumat tehnologiýalary ulgamlaryny ösdürmegiň we ykdysadyýeti sanlylaşdyrmagyň meselelerine bagyşlanan «Türkmentel — 2022» atly 15-nji halkara sergi we ylmy maslahat öz işine başlady. «Türkmentel — 2022-niň» işine 18 ýurtdan, şol sanda Türkmenistandan, Russiýadan, ABŞ-dan, Finlýandiýadan, Gazagystandan, Azerbaýjandan, Hytaýdan, BAE-den we beýleki döwletlerden 100-den gowrak wekiliýet gatnaşýar.

2. Koreý medeniýetiniň günleriniň çäklerinde Aşgabatda Koreý film festiwaly geçirilýär. «Aşgabat» kinoteatrynda koreý çeper filmleriniň görkezilişi dowam edýär.

3. Aşgabatdaky Magtymguly adyndaky milli sazly drama teatrynyň sahnasynda Koreýanyň «Gugak» kwartetiniň konserti geçiriler. konsertden öň sagat 18:00-da koreý milli aşhanasynyň tagamlarynyň tanyşdyrylyşy guralar. Şeýle-de myhmanlar «hanbok» atly milli lybas bilen tanşyp, isleglerine görä, ony geýip bilerler.

4. Aşgabatdaky Türkiýäniň ilçihanasynyň garşysyndaky Atatürk meýdançasynda Türkiýe Respublikasynyň esaslandyryjysy we ilkinji Prezidenti Mustafa Kemal Atatürküň ýadygärligine gül desselerini goýmak dabarasy geçirildi. Çäre Türkiýäniň milli Lideriniň aradan çykmagynyň 84 ýyllygyna bagyşlandy. Ýygnananlar görnükli türk reformatorynyň ýadygärligini bir minutlyk dymyşlyk bilen hormatladylar.

5. Türkmenistanyň Medeniýet ministrligi we Germaniýa Federatiw Respublikasynyň Türkmenistandaky ilçihanasy Aşgabadyň ýaşaýjylaryny we myhmanlaryny Resul Gylyjowyň ýolbaşçylygyndaky Döwlet simfoniki orkestriniň konsertine gatnaşmaga çagyrýar. Türkmenistan bilen GFR-niň arasynda diplomatik gatnaşyklaryň ýola goýulmagynyň 30 ýyllygyna bagyşlanan konsert 24-nji noýabrda sagat 19:00-da Magtymguly adyndaky milli sazly drama teatrynyň sahnasynda geçiriler.

6. 1-nji dekabrda «Berkarar» söwda-dynç alyş merkezinde öňdebaryjy türk öndrijileriniň meşhur aýakgaplarynyň dükany bolan «FLO-nyň» täze dükany açylar. Dükanyň hödürleýän harytlarynyň arasynda erkekler, zenanlar we çagalar üçin rahat hem-de owadan aýakgap görnüşleri bardyr.

7. 11-nji noýabrda Golliwudyň ýyldyzy, häzirki döwrüň iň owadan we meşhur aktrisalarynyň biri bolan Demi Mur 60 ýaş ýubileýini bellär. Demi Mur teletomaşaçylara 80-nji ýyllaryň ortalaryndan bäri tanyşdyr. Ol «Esger Jeýn», «Arwah», «Çarliniň perişdeleri» ýaly 50-den gowrak filmlerde dürli keşpleri janlandyrdy, üstesine ol multfimlere ses bermäge hem gatnaşýar. Şeýle hem Demi Mur Golliwudyň başga bir ýyldyzy Brýus Uillisiň aýaly hökmünde hem tanalýar, olaryň üç çagasy eýýäm kämillik ýaşyna ýetendir.

8. 11-nji noýabrda Gissarda (Täjigistan) Merkezi Aziýa futbol Assosiasiýasynyň goldaw bermeginde 2022-nji ýylyň jemleýji bäsleşigi badalga alar. Täjigistanyň, Owganystanyň, Eýranyň, Türkmenistanyň we Özbegistanyň 14 ýaşa çenli ýaşlar ýygyndylary sebitiň iň güýçli topary adyna eýe bolmak üçin özara güýç synanyşarlar.

9. Aşgabatdaky Olimpýa şäherçesinde stol tennisi boýunça Türkmenistanyň çempionaty geçirildi. Bäsleşige Türkmenistanyň ähli welaýatlaryndan 130-a golaý türgen gatnaşdy. Erkekleriň arasynda toparlaýyn bäsleşiklerde Alibek Jumanow, Ylýas Allanazarow, Igor Azarow we Wepa Meredow ýeňiji boldular. Zenanlaryň arasyndaky duşuşyklarda bolsa Oguljennet Nyýazgyjyjowa, Enejan Ballyýwa, Ogulgerek Hemraýewa we Bägül Begenjowa birinji orna mynasyp boldular. Erkekleriň arasynda ýekeleýin duşuşyklarda Alibek Jumanow, zenanlaryň arasynda bolsa Ogulgerek Hemraýewa ýurduň çempiony diýen ada eýe boldular.

Teswirler
Teswir ýazmak üçin içeri giriň ýa-da registrasiýa boluň