Gazagystanyň Mejlisiniň Senatynyň deputatlarynyň «Gazagystan-türkmen döwlet serhediniň geçýän ugruny kesgitlemek we Hazar deňzindäki balyk tutulýan zolaklaryň ýanaşyk böleklerinde çäk çekmek hakynda Gazagystan Respublikasy bilen Türkmenistanyň arasyndaky Şertnamany tassyklamak hakynda» Kanunyň taslamasyny makullandyklaryny habar berdiler. Kabul edilen Kanun gol çekmek üçin Gazagystanyň Prezidentine iberilýär diýip, «Kazinform» habar berýär.

Ozal habar berşimiz ýaly, şu ýylyň 16-njy aprelinde Türkmenistanyň Milli Geňeşiniň Halk Maslahatynyň birinji çagyrylyşynyň bäşinji mejlisiniň barşynda «Türkmen-gazagystan döwlet serhediniň geçýän ugruny kesgitlemek we Hazar deňzindäki balyk tutulýan zolaklaryň ýanaşyk böleklerinde çäk çekmek hakynda Türkmenistan bilen Gazagystan Respublikasynyň arasyndaky Şertnamany tassyklamak hakynda», «Türkmen-gazagystan döwlet serhediniň düzgüni hakynda Türkmenistanyň Hökümeti bilen Gazagystan Respublikasynyň Hökümetiniň arasyndaky Ylalaşygy tassyklamak hakynda» Türkmenistanyň Kanunlarynyň taslamalaryna garaldy. 17-nji aprelde bolsa, Türkmenistanyň Prezidenti Serdar Berdimuhamedow 2021-nji ýylyň 25-nji oktýabrynda Aşgabat şäherinde gol çekilen «Türkmen-gazagystan döwlet serhediniň geçýän ugruny kesgitlemek we Hazar deňzindäki balyk tutulýan zolaklaryň ýanaşyk böleklerinde çäk çekmek hakynda» Türkmenistan bilen Gazagystan Respublikasynyň arasyndaky Şertnamany tassyklamak hakyndaky resminama gol çekdi.

Resminama suwdaky biologik we ýerasty baýlyklardan peýdalanmak hem-de balyk tutmak üçin özygtyýarly hukuklaryň amala aşyrylmagy, şeýle hem iki ýurduň döwlet serhetleriniň durnuklylygy üçin oňyn şert döreder, şeýle hem Hazar deňziniň syýasy, ykdysady, sosial we medeni ähmiýetini ykrar etmek bilen, taraplaryň arasynda hoşniýetli goňşuçylyk gatnaşyklaryny giňelder.

«Çäk çyzyklary häzirki zaman halkara deňiz kanunlarynda garşylyklaýyn ýa-da ýanaşyk kenarýakaly döwletleriň arasynda deňiz giňişligini kesgitlemekde ulanylýan umumy ykrar edilen usul bolan orta çyzyk ýörelgesine esaslanýar» diýlip, habarda aýdylýar.

Ýeri gelende bellesek, Gazagystan bilen Türkmenistanyň arasyndaky döwlet serhediniň umumy uzynlygy 458 kilometre barabardyr.