31-nji martda Saud Arabystany Patyşalygynyň Aşgabadyndaky ilçihanasynyň binasynda ynsanperwer ýüküň gowşurylyş dabarasy geçirildi. Saud Arabystanynyň Patyşasynyň adyndan Türkmenistanyň Hökümetine hijri senenamasy boýunça 1447-nji ýylyň hasylyndan 25 tonna hurma sowgat berildi. Bu gowşurylyş Patyşalygyň dostlukly döwletleri goldamak boýunça halkara maksatnamasynyň çäklerinde amala aşyryldy.

Çärä Saud Arabystanynyň Türkmenistandaky ilçisi Amer bin Ali Al-Şehri, Türkmenistanyň Müftiliginiň wekilleri, şeýle hem Patyşa Salman adyndaky Ynsanperwer kömek we goldaw merkeziniň wekili Osman bin Raşid Al-Raşid gatnaşdy.

Dabaranyň dowamynda taraplar şeýle başlangyçlaryň iki ýurduň arasynda döwletara dialogy we ynsanperwer hyzmatdaşlygy ösdürmekde möhüm ähmiýete eýedigini bellediler.

Müftiligiň wekilleri gowşurylan sowgat üçin Saud Arabystany tarapyna minnetdarlyk bildirdiler we muny iki taraplaýyn durnukly gatnaşyklaryň nyşany hökmünde baha berdiler. Şeýle-de Saud Arabystanynda haj we umra zyýaratlaryny amala aşyrýan türkmen zyýaratçylary üçin döredilen şertler aýratyn nygtalyp geçildi.