Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň media habarlar wekili A.Jepbarowa degişli düzümler bilen netijeli gatnaşyklary ýola goýmagy hem-de guramanyň işini halkara derejesinde ilerletmegi güýçlendirmegi tabşyrdy. Bu tabşyryk Arkadag şäherinde geçirilen Gaznanyň müdiriýetiniň mejlisiniň dowamynda berildi. Bu barada TDH habar berýär.

​Mejlisiň dowamynda Gaznanyň ýolbaşçylary hasabat bilen çykyş etdiler. Bejeriş işleri boýunça wise-prezident Oguljahan Atabaýewa Gaznanyň bäş ýyllyk işiniň dowamynda 758 sany operasiýanyň geçirilendigini, 2467 çaganyň bolsa Gurbanguly Berdimuhamedow adyndaky Çagalaryň sagaldyş-dikeldiş merkezinde bejergi alandygyny habar berdi. 2025-nji ýylda ÝUNISEF, Hytaýyň Sun Sinlin adyndaky gaznasy we Geýdar Aliyew adyndaky gazna bilen özara düşünişmek hakynda Ähtnamalara gol çekildi.

​Gaznanyň wise-prezidenti R.Bazarow paýtagtyň we welaýatlaryň keselhanalarynyň pediatriýa bölümlerine Germaniýada öndürilen gemodializ apparatlarynyň gowşurylandygy, şeýle hem Azerbaýjanyň Fizuli şäherinde Gaznanyň serişdeleriniň hasabyna metjidiň gurluşygy barada hasabat berdi. Mundan başga-da, ol Gaznanyň ýanyndaky Ýaşulular geňeşiniň ýaşlary milli ruhy gymmatlyklara uýgunlaşdyrmak boýunça alyp barýan işleri barada maglumat berdi.

​Arkadag şäheriniň gurluşygy boýunça döwlet komitetiniň başlygy D.Orazow täze şäheriň gurluşygynyň ikinji tapgyrynyň barşy, şol sanda lukmançylyk klasteriniň desgalarynyň gurluşygy barada hasabat berdi. Gurbanguly Berdimuhamedow işleriň bellenen tertibe laýyklykda ýerine ýetirilmegini üpjün etmegi tabşyrdy.

​Mejlisiň jemleri boýunça Gurbanguly Berdimuhamedow Gaznanyň serişdeleriniň maksatlaýyn ulanylmagy, onuň kanunçylyk binýadynyň berkidilmegi, iş ýagdaýlaryna innowasion tehnologiýalaryň ornaşdyrylmagy we guramanyň hojalyk düzümleriniň sazlaşykly işiniň üpjün edilmegi barada hem anyk tabşyryklary berdi.