«Altyn globus» kino baýragynyň ýeňijileri «Hamnet» we «Söweş yzyna söweş» filmleri boldy diýlip, baýragyň saýtynda habar berildi.

 «Söweş yzyna söweş» filminiň režissýory Pol Tomas Andersen «iň oňat režissýor» we «iň oňat ssenariçi» baýraklaryna mynasyp boldy.

«Iň oňat animasion film» ugry boýunça «Keýpop - arwahlary awlaýjy» multfilmi, daşary ýurt dilindäki iň oňat film hökmünde brazil režissýory Kleber Mendons Filiň «Gizlin jansyz» taryhy trilleri yglan edildi.

Drama filmdäki iň oňat erkek keşbi üçin baýraga «Gizlin jansyz» filminde keşp döreden Wagner Moura, dramada iň oňat zenan keşbi üçin baýraga «Hamnet» filminde çykyş eden Jessi Bakli mynasyp boldy.

 11-nji ýanwarda Los-Anjelesde 1940-njy ýyllarda Golliwudyň daşary ýurtly žurnalistler assosiasiýasy tarapyndan esaslandyrylan «Altyn globus» kino baýraklarynyň 83-nji gezek gowşurylyşy boldy.