Hindistanda wodorodda işleýän ilkinji otlynyň synagyna girişildi. «The Indian Express» gazetiniň ýazmagyna görä, Çennai şäherinde işlenip düzülen otly ýurduň Işläp düzmeler we dizaýn boýunça guramasynyň (RSDO) gözegçiliginde synagdan geçirilýär. Eger hünärmenleriň oňyn bahasyny alsa, wodorodly otly Hindistanyň ekologik taýdan arassa ulaglara geçmeginde möhüm ädim bolar.

 Ýurduň demir ýollary ministri Aşwini Waýşawanyň sözlerine görä, ýurt bu ýangyçda işleýän otlulary işe goýbermek babatda Germaniýadan, Ýaponiýadan, Şwesiýadan we Hytaýdan yza galýandygyna garamazdan, tiz wagtda uly öňegidişlik gazanar.

 Täze otluda 10 wagon bolar, lokomotiwiň kuwwaty 2400 kilowatta ýeter. Şunda kömürturşy gazyň zyňyndylary nol derejä deň bolar.

 Hindistanyň Hökümeti golaý ýyllarda energiýanyň arassa çeşmelerine köpçülikleýin geçmekçi. Bu ugurda wodorod önümçiligine aýratyn üns berilýär, ony daşary ýurtlara hem eksport etmek meýilleşdirilýär.