2026-njy ýylyň başyndan başlap, Beýik Britaniýada azyk önümleriniň belli kategoriýalarynyň mahabatyna degişli täze düzgünler güýje girdi. Kabul edilen çärelere laýyklykda, düzüminde şeker, ýag we duz mukdary ýokary bolan harytlaryň internetde mahabaty gadagan edildi, telewideniýede bolsa olaryň görkezilmegi agşam sagat 21:00-dan soňky wagt bilen çäklendirildi.

Beýik Britaniýanyň Saglygy goraýyş ministrligi 2025-nji ýylyň oktýabr aýyndan başlap täze talaplara meýletin esasda eýermäge başlan azyk önümleriniň we içgileriň öndürijilerine minnetdarlyk bildirdi.

Gadagançylygyň täsiri astyna 13 kategoriýadaky haryt girýär, olaryň hatarynda goşmaça şeker goşulan gazsyz içgiler, çipsler we şokoladly batonçikler bar. Täze düzgünleriň berjaý edilmegine mahabat standartlary müdirligi gözegçilik edýär.

The Guardian gazetiniň belleýşi ýaly, reklamasy çäklendirilýän önümleriň sanawy birnäçe kadadan çykmalary we takyklamalary öz içine alýar. Food Foundation guramasynyň direktory Anna Teýlor häzirki kanunçylygyň anyk önümleriň mahabatyna çäklendirme girizilende-de, kompaniýalaryň brendleriniň mahabatyna rugsat berýändigini belledi.