Täze ýylyň öňüsyrasynda Akdepe etrabynyň Daýhan obasynyň ýaşaýjysy Nowar Gylyjowa öz 110 ýaşyny belledi. Ol öz ýaş toýuny çagalarynyň, agtyklarynyň, çowluklarynyň we obadaşlarynyň arasynda belledi. Obada ony «uly maşgalanyň diregi» diýip atlandyrýarlar - diýip, «Türkmenistan» gazeti ýazýar.

Nowar enäniň üç ogly, iki gyzy, 16 agtygy we 6 çowlugy bar. Ýakyn wagtda maşgalanyň täze agza bilen ulalmagyna garaşylýar. Nowar enäniň ähli çagalary we agtyklarynyň köpüsi öz durmuşlaryny mugallymçylyk käri bilen baglanyşdyrypdyr. Şonuň üçin obada bu maşgala «mugallymlar maşgalasy» diýip atlandyrylýar. Nowar enäniň ogly Tirkeş bolsa ýerli 39-njy orta mekdepde zähmet sapagynyň mugallymy bolup, 55 ýyldan bäri zähmet çekip gelýär.

«Maňa öz zähmetimiň miwesini görmek we maddy taýdan bol-elinlikde ýaşamak bagty miýesser etdi. Meniň çagalarym bagtly maşgalalar bolup ýetişdiler, agtyklarymyň köpüsi eýýäm özbaşdak ýaşaýar» — diýip, Nowar ene şatlygy bilen paýlaşýar.

Nowar Gylyjowa ömrüni oba hojalygynda zähmet çekmeklige bagyşlapdyr. Uzak ömür süren enäniň sözlerine görä, onuň uzak ýaşamagynyň syry — ýagşy dilegler, dogruçyllyk we çagalary hakda alada edip ýaşanlygydyr.

Täze ýyl baýramçylygynda ähli maşgala agzalary bir ýere jemlenýärler. Uly agtygy Ahal welaýatynda mugallym bolup işleýär we enesi bilen yzygiderli aragatnaşyk saklaýar.

Täze ýyl mynasybetli watandaşlaryny gutlap, Türkmenistanyň 110 ýaşly ýaşaýjysy Nowar ene hemmelere saglyk, uzak ömür we bagtyýarlyk arzuw etdi.