«Arkadag» futbol topary Türkmenistanyň Kubogynyň ýarym finalynyň jogap duşuşygynda «Aşgabady» 4:1 hasabynda ýeňip, ýaryşyň finalyna çykdy. Oýun paýtagtdaky «Nusaý» stadionynda geçirildi.

Ýeňiji toparyň düzüminde hüjümçi Didar Durdyew dubl etdi (21-nji we 86-njy minutlar). Şeýle hem Ahmet Ataýew (45+1) we Diýargylyç Orazow (88-nji minut) gol salmagy başardylar. «Aşgabadyň» ýeke-täk goluny Mergen Nurlyýew (37) öz adyna ýazdyrdy.

Birinji ýarym final duşuşygynda hem «Arkadag» 3:1 hasabynda ýeňiş gazanypdy. Şeýlelikde, iki oýnuň netijesi boýunça (7:2) «Arkadag» finala çykmagy başardy.

Türkmenistanyň Kubogynyň finalynda «Arkadag» «Ahal» topary bilen duşuşar. Final duşuşygy 27-nji dekabrda geçiriler.