Girmek
2-nji dekabrda Magtymguly adyndaky milli sazly drama teatrynda Türkmenistanyň hemişelik bitaraplygynyň 30 ýyllygyna bagyşlanan çagalar konserti boldy.
Konsert tomaşaçylaryň zaly dolduryp gatnaşmagynda geçdi — diýip, newscentralasia.net saýty habar berýär.
Sahnada ýaş aýdymçylar, sazandalar we tans toparlary öz sungat we döredijilik zehinlerini görkezdiler. Konsertiň maksatnamasynda türkmen kompozitorlarynyň nusgawy eserleri, daşary ýurt multfilmlerinden we kinofilmlerinden sazlar ýerine ýetirildi.
Konsertiň dowamynda türkmen kompozitorlarynyň watançylyk eserleri ýaňlandy: R. Nepesowyň «Bitaraplyk» simfoniýasyndan bölek, N. Ataýewiň sazyna, A. Muldyýewanyň sözlerine döredilen «Bitaraplyk — Parahatçylyk» aýdymy hem-de A. Ýazmuhammedowyň sazyna, G. Garaýewanyň sözlerine döredilen «Meniň garaşsyz bitarap Türkmenistanym» aýdymy ýerine ýetirildi. Her çykyş tomaşaçylaryň joşgunly el çarpyşmalary bilen garşylandy.
Konsertiň jemleýji böleginde paýtagtymyzyň we Arkadag şäheriniň sazçylyk mekdepleriniň birleşen simfoniki orkestriniň sazlaryna tansçylar Russiýanyň, Türkiýäniň, Özbegistanyň, Azerbaýjanyň we Ermenistanyň halk tanslaryny görkezdiler. Jemleýji çykyşda bolsa «Küştdepdi» milli tansy ussatlyk bilen ýerine ýetirildi. Şu pursat zalda şowhunly el çarpyşmalar ýaňlandy.