Şu gün Aşgabatdaky Olimpiýa şäherçesiniň Tennis toplumynda «Bitaraplyk we ynsanperwerlik: inklýuziw geljegiň bähbidine hemmetaraplaýyn goldaw» atly çäre geçirildi. 

Bütindünýä çagalar güni mynasybetli guralan çärä Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa, Birleşen Milletler Guramasynyň Türkmenistandaky hemişelik utgaşdyryjysy Dmitriý Şlapaçenko, ÝUNISEF-niň Türkmenistandaky wekili Jalpa Ratna, şeýle-de Daşary işler, Saglygy goraýyş we derman senagaty, Bilim, Zähmet we ilaty durmuş taýdan goramak, Medeniýet, Söwda we daşary ykdysady aragatnaşyklar ministrlikleriniň, Aşgabat şäher häkimliginiň, Türkmenistanyň Döwlet, demokratiýa we hukuk institutynyň, Türkmenistanyň Adalatçysynyň diwanynyň, Bedenterbiýe we sport baradaky döwlet komitetiniň, Tennis federasiýasynyň, Türkmenistanda akkreditirlenen halkara guramalaryň we daşary ýurt döwletleriniň diplomatik wekilhanalarynyň, türkmen we daşary ýurt köpçülikleýin habar beriş serişdeleriniň, ýurdumyzyň degişli ýokary okuw we orta mekdepleriniň, çagalar baglarynyň wekilleri, Durnukly ösüş maksatlarynyň ýaş ilçileri, çagalar hem-de olaryň ene-atalary, sosial torlaryň, habar beriş serişdeleriniň üsti bilen çagyrylan jemgyýetçilik köpçüligi gatnaşdy. Türkmenistanyň körler we kerler jemgyýeti, Maýyplygy bolan adamlara goldaw merkezi, «Ýeňme» jemgyýetçilik guramasy hem çäräniň hyzmatdaşlary bolup çykyş etdiler.

Çäräniň çäklerinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň, ÝUNISEF-niň, Türkmenistanyň Saglygy goraýyş we derman senagaty, Bilim, Zähmet we ilaty durmuş taýdan goramak ministrlikleriniň sergisi hem guraldy. Ýurduň we Birleşen Milletler Guramasynyň resmi wekilleri sergä aýlanyp görüp, onda ýerleşdirilen pawilýonlar, Türkmenistanda degişli ugurlarda alnyp barylýan giň gerimli işler, gazanylan üstünlikler bilen tanyşdylar. 

Bütindünýä çagalar güni mynasybetli geçirilen çäräniň dowamyndaky çykyşlarda Türkmenistanda howandarlyga mätäç çagalara hemaýat bermek boýunça döwlet derejesinde edilýän tagallalar, bu ugurda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan giň gerimli, asylly işleri, ýurdumyzyň daşary ýurtlar bilen gatnaşyklarynda-da berk eýerýän ynsanperwer ýörelgeleri, ösüp gelýän ýaş nesilleri hemmetaraplaýyn üns-alada bilen gurşap alyp, olar üçin döredilýän uly mümkinçilikler barada giňişleýin söhbet edildi. 

Arkadag şäherindäki Gurbanguly Berdimuhamedow adyndaky çagalar sagaldyş-dikeldiş merkeziniň çagalarynyň çykyşlary, mümkinçiligi çäkli çagalaryň tennis boýunça bilelikdäki oýunlarynyň görkezilmegi, şeýle-de çagalaryň arasynda gysga görkezme tennis ýaryşynyň guralmagy we simwoliki diwaryň (pazl) düzülmegi çäräniň täsirliligini has-da artdyrdy.

Ynsanperwer ugurly çäräniň barşynda onda çykyş eden çagalara sowgatlaryň gowşurylyş dabarasy hem boldy we olar bilen ýadygärlik surata düşüldi. Munuň özi bagtyýar ýaş nesilleriň şatlygyny has-da artdyrdy. Bu barada Türkmenistanyň Bilim ministrligi habar berýär.