Haýyr-sahawat gaznasynyň wise-prezidenti Oguljahan Atabaýewa iş saparynyň çäklerinde Tawriçeskiý köşgünde geçirilýän «Modanyň Arkalaşygy» atly halkara forumyň «Sagdyn bolmak modadyr» atly sessiýasyna gatnaşdy.

TDH-niň habar berşi ýaly, «Modanyň Arkalaşygy» halkara forumy Garaşsyz Döwletleriň Arkalaşygyna agza ýurtlarda moda pudagyny, dokma senagatyny we dizaýny ösdürmäge bagyşlanyp, her ýyl geçirilýän çäredir. Ol tejribe alyşmak, täze egin-eşik toplumlaryny tanyşdyrmak, pudagy ösdürmegiň ugurlaryny ara alyp maslahatlaşmak, işewürlik gatnaşyklaryny pugtalandyrmak maksady bilen, dizaýnerleri, ugurdaş hünärmenleri, bilermenleridir işewürleri bir ýere jemleýär.

Halkara forumyň «Sagdyn bolmak modadyr» atly sessiýasynda moda pudagynyň hem-de saglygy goraýyş ulgamynyň bilermenleri sagdyn durmuş ýörelgelerini gündelik moda ornaşdyrmagyň ugurlaryny ara alyp maslahatlaşdylar. Sessiýanyň dowamynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewanyň çykyşyna hem uly orun berildi.

Çykyşda bellenilişi ýaly, Türkmenistanda adam saglygy barada alada döwlet syýasatynyň ileri tutulýan ugrudyr. Ýurtda 1995-nji ýyldan bäri «Saglyk» Döwlet maksatnamasy üstünlikli durmuşa geçirilýär. Maksatnamanyň çäklerinde hem-de «Sagdyn ene — sagdyn çaga — sagdyn geljek» atly milli strategiýanyň esasynda adamlaryň saglygyny goramak üçin ähli amatly şertler döredildi. Sanitar-ekologiýa kadalarynyň berjaý edilmegine, azyk önümleriniň hiline, amatly zähmet, bilim, durmuş, dynç alyş şertleriniň üpjün edilmegine, ahlak gymmatlyklarynyň we sagdyn durmuş ýörelgeleriniň berkarar edilmegine aýratyn üns berilýär.

Häzirki wagtda Türkmenistanda BMG-niň Ösüş maksatnamasy, Ilat gaznasy, Bütindünýä Saglygy Goraýyş Guramasy, Çagalar gaznasy bilen hyzmatdaşlyk hakynda resminamalaryň 26-syna gol çekildi we olaryň çäklerinde her ýyl dürli taslamalar durmuşa geçirilýär. Mundan başga-da, Türkmenistan ikitaraplaýyn gatnaşyklary ösdürmek, sebit hyzmatdaşlygyny ýola goýmak boýunça işleri alyp barýar. Ýurduň Hökümeti bilen BMG tarapyndan her bäş ýyldan kabul edilýän Türkmenistan üçin ýurt boýunça Maksatnamanyň resminamasy alnyp barylýan maksatnama-taslama işiniň esasyny düzýär. Ýakynda 2026 — 2030-njy ýyllar üçin niýetlenen nobatdaky Maksatnama kabul edildi.

Türkmen wekiliýetiniň ýolbaşçysy çykyşynyň dowamynda haýyr-sahawat gaznasynyň alyp barýan işi barada hem belläp geçdi. Çykyşynyň ahyrynda Oguljahan Atabaýewa gaznanyň hyzmatdaşlyk etmäge, tutuş dünýäde adamlaryň saglygyny goramagyň bähbidine bilelikdäki çemeleşmeleri işläp taýýarlamaga açykdygyny aýdyp, özara tagallalar bilen bu maksatlary gazanmaga uly goşant goşup boljakdygyna ynam bildirdi.