Türkmenistanyň Gurluşyk we binagärlik ministrliginde 2025-nji ýylyň 8-nji oktýabrynda №72 belgili buýruk çykaryldy. Bu buýruk paýly gurluşyga gatnaşmak boýunça birkysmy şertnamanyň  käbir düzgünlerine üýtgetme girizýär. Resminama 2019-njy ýylyň mart aýynda tassyklanan birkysmy şertnamanyň düzgünlerine käbir üýtgetmeleriň girizilmegi bilen kämilleşdirýär. Bu buýruk Adalat ministrliginiň saýtynda çap edildi.

Täze üýtgetmelere laýyklykda şertnamada gozgalmaýan emlägiň desgalarynyň tehniki häsiýetnamalaryny görkezmegiň tertibi anyklaşdyryldy. Hususan-da, ýaşaýyş jaýlary beýan edilende indi aşhana, hammam we hajathana otaglarynyň, eýwanyň, kömekçi otaglaryň hem-de peýdalanylýan balkonyň meýdany aýratynlykda görkezilmelidir. Şeýle hem «sement we gips garylgy suwag» diýen bezeg-timarlaýyş materiallaryny beýan etmegiň talaplary anyklaşdyryldy.

Üýtgetmeleriň esasy böleklerinden biri tölegiň tertibine degişlidir. Resminama birkysmy şertnamanyň bahasynyň paýçy tarapyndan desga boýunça taslama meýdanyna laýyklykda bellenen möhletlerde doly tölenmelidigini kesgitleýär. Şeýle-de paýçy bilen gurujynyň arasyndaky özara hasaplaşyklar diňe şertnama gurluşyk we binagärlik babatynda ygtyýarly döwlet edarasynda hasaba we döwlet bellige alnandan soň amala aşyrylyp bilner.

Tölegleriň geçirilmeginiň tertibine hem üýtgetmeler girizildi. Indi tölegler gurujynyň karz edarasynda açylan ýörite bank hasabyna nagt ýa-da nagt däl görnüşde geçirilmelidir.

Buýrugyň ýerine ýetirilişine gözegçilik etmek Türkmenistanyň Gurluşyk we binagärlik ministriniň orunbasary B. Halykowyň üstüne ýüklenildi.